Nan ta pa preveni, sanciona y corrigi
E comportacion incorecto di e lider di MEP na fin di e conferencia di parlamentarionan di Reino siman pasa, a lanta un discucion den comunidad riba integridad di hende den comunidad y di politiconan en particular. E comentarionan di ciudadanonan den corant, na radio y den media social, ta mustra cu tin un majoria grandi di pueblo cu kier pa hende actua corecto den tur situacion. Sea ta un empleado publico cu mester duna servicio na pueblo, un politico den parlamento of gobierno, un polis, un docter, un abogado of trahado den magasina di un supermercado. No ta importa ken, unda o ki ora di dia of anochi. Pueblo den su majoria kier comportacion corecto y di acuerdo cu ley, regla y decencia comun.

E reaccion di miembronan di e partido MEP sinembargo tabata completamente contrario na resto di pueblo! Enbez di reconoce erornan cometi e siman prome, tempo MEP tabata den gobierno of awor aki den oposicion, e miembronan di MEP a defende nan lider y ataca otronan, comosifuera ta culpa di otro hende cu e lider y miembronan di MEP den pasado y awor aki a keda sin cumpli ley of actua no-integro/incorecto. E pregunta cu hopi hende a keda sin haya contesta di MEP pe ta: Con bo por defende gañamento? Miembronan di partido AVP al contrario a enfatisa cu cualkier regla of ley mester conta pa tur hende y tur ora. Tambe pa miembronan di Parlamento y ministernan. E contraste entre con pueblo y AVP ta pensa y na orto banda con MEP ta pensa, ta mustra con leu miembronan di MEP ta para di e realidad di loke ta biba den pueblo y con pueblo ta pensa y sinti. 

Expresionnan haci den e articulo aki no necesariamente ta refleha opinion di ArenaPoliti.co