E presupuesto pa 2017 cu gobierno a entrega dia 1 di september ultimo, ta cuadra cu loke a palabra: e ta na tempo y e deficit a sigui baha te na 0.5%. Exactamente manera a palabra algun aña pasa!

CONSTITUCION
Constitucion di Aruba ta prescribi cu e presupuesto pa e aña cu ta sigui, mester wordo entrega na Parlamento pa mas tarda dia 1 di september di e aña prome. Pa hopi aña gobiernonan di Aruba no por a entrega e presupuesto di e siguiente aña na tempo. Tabata tin aña bou gobernacion di MEP, cu e presupuesto no a wordo entrega mes! Un di e problemanan ta e administracion antigua y complica di aparato di gobierno. Fraccion di AVP a insisti pa trece cambio den e administracion financiero pa e ta mas corecto y mas eficiente. Minister di finansa sr Angel Bermudez a presenta un plan cu ta wordo ehecuta awor aki. Aunke e plan no a wordo implementa completamente, ya por wak resultado di e renobacion di e sistema di administracion financiero di gobierno. Pa prome biaha den masha hopi aña e presupuesto di gobierno ta wordo entraga na tempo: dia 1 di september!

DEFICIT
E bon noticia di e presupuesto 2017 no ta solamente cu ela wordo entrega na tempo. Loke e presupuesto ta ensera tambe tin hopi cos bon pa maneho financiero di gobierno di nos pais. Un di e puntonan mas importante ta e trayecto cu a wordo defini tres aña pasa pa yega na presupuestonan balansa. Esey kier men cu e entradanan cu gobierno ta haya, ta cubri tur su gastonan. Un forma pa midi e desaroyo ey, ta pa wak e deficit riba e presupuesto. E deficit riba e presupuesto pa masha hopi aña ta mucho halto, cu ta nifica cu e entradanan di gobierno no ta yega pa cubri e gastonan. Gobierno mester a baha gasto y subi entrada pa yega na un presupuesto balansa. Contrario na gobernacion di MEP cu tambe a purba yega na un presupuesto balansa, gobierno di AVP ta yegando eynan sin tuma medida. Bou di gobierno di MEP, medida tabata e forma pa haya placa pa cubri gastonan. Gobiernonan di MEP no por a baha gasto y subi entrada sin medida. AVP a bisa for di comienso cu no por laga Pueblo paga pa malgastamento di gobiernonan di MEP. Pesey gobierno a stimula economia, inverti den proyectonan grandi y valioso pa nos pais, crea mas cupo di trabou y subi entrada, SIN tuma niun medida contra pueblo. E resultado den e presupuesto ta cu e deficit pa 2017 lo ta manera palabra:0.5%

BALANSA
E presupuesto pa 2017 lo mester ta e ultimo presupuesto cu un deficit. E siguiente lo mester pa un cu 0% deficit of hasta cu un surplus chikito di 0.5%. Di e forma aki finansa di gobierno tambe lo ta bek den balansa. Hunto cu esey nos lo tin un economia mas balansa ora e refineria habri. Esaki ta nifica un desaroyo general mas balansa na Aruba. Exactamente loke gobierno di AVP a planea y ta realisa, paso a paso. Pero keda pendiente, ainda falta!

Expresionnan haci den e articulo aki no necesariamente ta refleha opinion di ArenaPoliti.co