No ta keda un duda pa e Minister di Desaroyo Teritorial, Infrastructura y Integracion, Benny Sevinger cu ciudadano Nelson Sprok ta merecedo di haya e caya dilanti di su cas na su nomber. Esey e Minister Benny Sevinger a reitera diamars atardi durante e ceremonia di develo di e borchi nobo pa ‘Caya Nelson Florencio Sprok’. Pa Sr. Sevinger, Sprok ta un ehempel di superacion, pero mas ainda, di convivencia y comunitarismo. E tabata hopi contento di por a forma parti di e dia special aki pa den nomber di Gobierno felicita e y su famia cu e honor aki.

Den algun palabra cu Minister Sevinger a comparti cu Sr. Sprok, su famia y e cantidad grandi di amigonan cu a bini hunto pa e ocasion, el a menciona cu ora a haya e resumen di bida di Sr. Sprok, no a keda otro cu bisa cu e decision aki ta uno corecto. “Si mira tur loke el a haci for di tempo cu el a bin y lucha pa su famia, pero tambe pa tur famia cu ta forma parti di e compania Conar, nos ta bisa esaki ta e ehempel cu mester sigui,” asina e Minister a expresa.

El a desea Sr. Sprok hopi pabien cu su di 75 cumpleaños y hopi aña mas hunto cu su casa. Algun ehempel di e accion valioso cu Sr. Sprok a haci den su bida y cu Minister Sevinger a menciona ta educacion di su yiunan, fundacion y progreso di su compania, dedicacion na agricultura, tempo pa nos grandinan, pa nos cultura y pa actividadnan di bario. Den conclusion, “traha tur dia duro pa mañan ta miho cu ayera y esey ta wordo transmiti pa e futuro generacion,” tabata e palabranan di e mandatario. El a finalisa bisando “Nos ta bay cu un curason contento pa cu e dia di awe.”

Expresionnan haci den e articulo aki no necesariamente ta refleha opinion di ArenaPoliti.co