Gabinete Eman den ultimo dianan ta hungando cu pueblo y purba midi e comentarionan relaciona cu aceptacion di un "transfer tax/levy. Ta imporante pa refresca pueblo su memoria cu na un promer instante ta e propio Minister president a declara for di november aña pasa cu ministerraad a papia over un remplaso di FDA cual lo carga nomber di Aruba investment fund. Na comienso minister di finansas no kier a papia riba belasting/cobransa aki y a laba man señalando cu esaki ta cai bou Minister di economia. Den e ultimo simanan cu a pasa un ta declara cu e lo no wordo implementa e aña aki y e otro ta bisa cu e transaction tax ainda ta riba mesa. Pa corona e obra e Minister di infrastructura ta aparece y a menciona un tarifa di 0.5% como cobransa riba cada transaccion. Con bo kier jame of ki percentahe e ta realidad ta keda cu Gabinete Eman no ta for di awor ta pensando con pa ranca mas placa for di pueblo pa por cumpli cu caprichonan.

Pero kiko realmente ta un financial transfer tax? Riba cual tipo di transaccion lo bai cobra pueblo e cobransa aki? Tin dispensacion riba cierto transaccionan? Tur esakinan ta pregunta cu pueblo tin y kier haya contesta riba nan. Netamente pa e falta di claridad fraccion di MEP a hasi pregunta durante tratamento di presupuesto. Nos a ricibi como contesta "op alle vrijwillige transacties" cual ta nifica riba tur transaccion bancario. Esaki kiermeen cu Gobierno lo kier cobra un percentahe riba tur transaccion bancario por ehempel tur persona cu ta cobra via banco lo mester paga e impuesto/cobransa aki for di nan salario na transfertax. Otro ehempelnan ta pago via banco pa entre otro schoolgeld, lening, donacion, pago di coriente, awa, telefoon, cable, internet. Esaki no ta keda te aki, uso di ATM pa lanta placa y SWIPE  of riba uso di Credit Card tambe bo ta paga e % di transfer tax! 

Gremionan ta contra!
E efectonan di un cobransa asina no solamente  lo wordo perhudica e pueblo aumentando costo di bida pero tambe comercio den su totalidad. E liña central ta cu e por ta devastador pa nos economia! Gremionan manera Ahata, Atia, Asociacion di banconan y Camara di comercio a expresa caba cu nan ta contra pa diferente motibonan entre otro cu e lo manda nos bai bek pa un cash economy cu tur su consecuencianan y cu e lo aumenta cost of doing business. Camara di comercio a declara na un manera hopi cla cu " nos lo haya golpi si introduci bank transfer tax pasobra den un solo golpi nos isla lo bira hopi mas caro cu e ta caba, pa tur hende"

Ta importante pa remarca cu desde Gabinete Eman a menciona e medida burdugu aki nan no por a bin cu un solo argumento di peso pa defende introduccion di e financial transfer tax. E ta un hecho cu e medida aki tin hopi mas desventaha pa full pueblo y comercio cu ventaha. Es mas no a sali ni un solo rapport positivo riba esaki pasobra esun cu a sali di Banco Central ta hustamente desaconseha pa introduci e financial transfer levy/tax. Tin hopi motibo contra esaki y e consecuencianan por ta devastador ta pesei pueblo no mester bai acepta pa e gobierno burdugo aki ranca ni un cent mas for di dje cu financial transfer tax! 

Expresionnan haci den e articulo aki no necesariamente ta refleha opinion di ArenaPoliti.co