No corta pa drecha cifra, pero pone pais bek riba pia pa despues prepar'e pa futuro

Ciudadano Jaime Falconi a haci mi 5 pregunta riba maneho di nos pais. Den tres articulo mi ta duna mi contesta. Ata aki e pregunta number 5 y mi contesta.

Pregunta # 5
"Groeien y no snoeien" ta e maneho di gobierno cu a acelera un aumento barbaro di e debe nacional. Segun sr. Herde "esey no ta e unico cos cu ta conta. E calidad di bida, mas hende cu trabao, cuido di salud pagabel pa tur hende, entradanan mas sigur pa trahado y pensionado, miho oportunidad pa habri negoshi y haci ganashi, oportunidadnan nobo pa hobennan". Kende ta beneficia anto di e cambionan manera menciona door di sr. Herde. Prijs di comestibel a subi y tur cos a bira mas caro a base di e medidanan cu a y lo wordo tuma. E forsa di compra en berdad a wordo debolbe na pueblo y comercio? Dicon tanto critica anto di pueblo y comercio?

Contesta: Laga mi corrigi sr. Falcony. Nos a scohe pa pone economia crece prome ("groeien") pa despues reforma, cambia, renoba y mehora tur area di nos comunidad y den gobierno. No ta e un of e otro so. No ta "groeien" of "snoeien". Pero tur dos den e secuencia y cu e velocidad cu ta miho pa economia y forsa di compra di pueblo. E forma cu AVP a scohe pa saca Aruba y nos hendenan for di e crisis, tabata pa prome lanta nos economia cu a cay cu 15% y baha e desempleo for di e 12% cu e tabata, door di crea trabou den sector priva y stimula nos economia cu proyectonan di infrastructura cu placa di pueblo. Pasobra sector priva no tabata cla pa inverti ainda. Den e proceso di saca nos pais for di e crisis aki, nos a scohe pa mehora e forsa di compra di trahadornan di gobierno (= indexering y promocion) y di sector priva (= reparatietoeslag), di e mas cu 20 mil pensionadonan, viuda y huerfanonan (= reparatietoeslag). Esaki tabata tin e dobbel efecto di yuda famianan tene nan forsa di compra durante di e crisis y alavez e placa aki a bay bek den economia via consumo cu a tambe a stimula nos economia. Unavez esaki a logra tabata tin espacio pa cuminsa haci e cambionan grandi den economia, reforma finansa publico door di e combinacion di baha gastonan structural di gobierno, reduci e dependencia di fondonan di pensioen y seguro medico di gobierno y reorganisa aparato di gobierno pa e por traha cu menos hende y mas eficiente y productivo. E reformanan aki tabata tin un dobbel efecto: sigura e forsa di e fondonan pa hopi aña, mehora funcionamento di e aparato y baha gasto di operacion di gobierno. Kier men cu nos a scohe pa sali for di e "tripel-crisis" economico, financiero, di infrastructura, laboral y social cu nos tabata aden, no door di djies corta gasto pa drecha finansa publico. Corta gasto ("snoeien") so, lo a nifica manda hende cas sin otro entrada, hisa costo di bida y corta circulacion di placa den economia. AVP a scohe (!) concientemente pa uza e forsa limita di gobierno na e momento cu e crisis tabata mas severo, pa "jump-start" nos economia, crea trabou y pone placa bek den saco di famianan. Sr. Falconi ta puntr "Ken a beneficia di esaki"?Henter nos pais! Si no ta asina, splica e situacion cu lo tabata tin na Aruba si no a stimula economia cu inversionnan den infrastructura y mehora forsa di compra. Pa loke ta critica: critica semper lo tin sr. Falconi. Hasta ora bo ta haci cosnan cu ta bon pa bo pais. Semper lo tin hende cu ta sinti cu e ta malo, cu mester a haci mas of no mester a haci'e. Esey ta e realidad. Pero realidad ta tambe cu ta facil pa critica esnan cu a soluciona e problema cu Bo a crea y bay laga atras. Pero nos mes di AVP sa cu nos trabao no ta cla. Ainda tin hende cu ta busca trabao y ainda tin hopi cos pa mehora den gobierno y den nos pais. Ta pesey nos mes ta bisa: aunke hopi a wordo haci caba.....AINDA FALTA.

Expresionnan haci den e articulo aki no necesariamente ta refleha opinion di ArenaPoliti.co