Tabata un hilaridad pa diripiente tende e lider di MEP papia di enseñansa. Pio ainda pa tende bisa cu gobierno no lo tin atencion pa enseñansa. Segun e lider di MEP gobierno no lo ta inverti den enseñansa. E reaccion cu mas bo a tende riba e declaracion di e lider di MEP tabata "mira ken ta papia". E critica di partido MEP sinembargo no ta pasobra di un preocupacion sincero pa enseñansa. E meta di e critica di MEP ta pa AVP bisa cu bou di MEP no tabata tin placa pa enseñansa, pa despues MEP bira usa e critica aki contra di nan ex-miembro di partido y ex-minister di enseñansa Marisol Lopez-Tromp. Puro muchachada. Enbez di pone atencion sincero na asuntonan di nos pais y yuda den un forma constructivo, enbez di propone miho idea y plannan, MEP ta pasa nan tempo ta lansa critica sin sentido. Aparentemente nan no a ripara cu pueblo si a wak esey caba.

REALIDAD DI ENSEÑANSA

E realidad di nos enseñansa ta cu mester sigui renoba e sistema di organisa scol, di renoba e forma di duna les y evalua resultadonan, di renoba contenido y didactica, di cambia e sistema selectivo pa uno di sosten sistematico, di duna nos maestronan di scol e instrumentonan cu nan tin mester pa duna tur nos muchanan, esnan sabi y esnan cu mester di mas ayudo, e miho enseñansa posibel. Na tur scol y na tur nivel. Pa logra esey tur esfuerso, tur atencion y tur placa mester bay pa e meta aki. Den e programa di partido AVP cu a presenta na pueblo y na enseñansa aña pasa, a pone un cantidad di programa cu segun nos ta necesario awor aki. Programanan manera introduccion di e Ordenansa riba Inovacion den Enseñansa, introduccion di e maneho di Cuido di Cañidad cu instrumentonan di control di rendimiento, e sistema di Cuido di Docente pa tur sector di enseñansa, e Plan pa cuido Pre-Escolar. Wak pagina 25 di e programa di partido AVP pa mas di loke si mester y ta bay sosode den enseñansa.

MEP por sigui lansa critica sin contenido djis pa no discuti riba contenido y realidad di enseñansa. Den comunidad y den enseñansa no ta spera nada di MEP riba tereno di enseñansa. E unico persona cu MEP tabata tin pa haci esey awor ta den fila di AVP.

Expresionnan haci den e articulo aki no necesariamente ta refleha opinion di ArenaPoliti.co