Ta parce cu nos gobernantenan “ta warda baca caba di hoga” pa despues por bay tuma e debido accionnan necesario of ta scoge pa “schuif “ nan responsabilidad cada biaha. Esaki no ta diferente pa loke ta trata e actonan di vandalismo riba varios scol rond Aruba. Algo cu por cierto ta tuma lugar riba un base repitivo sin cu a stipula un plan di prevencion y proteccion pa e facilidadnan escolarnan aki.

Iresponsabilidad
Algun dia pasa Julianaschool, Prinses Amalia, St. Franciscus College y Bon Bini College tawata victima atrobe di actonan di vandalismo. Nos a compronde cu e ladroncianan aki tin di haber cu koper y cu e ta un trend cu no tin un fin. Ora cu nos a kere cu porfin Minister di Enseñansa lo tuma carta den e asunto aki y tuma decisionnan rekeri pa cuida e facilidadnan di ladronicia en general el a sali declara lo siguiente. “En bes cu nos nota cu e problema ta disminuyendo, e ta aumentando! Mi ta bolbe haci un apelacion dramatico riba mi colega di Husticia, Arthur Dowers y na Alto Comisario di Polis”. Esaki ta crea e impresion cu e minister en cuestion mes no ta asumiendo responsabilidad pa bin cu un solucion.

Facilidadnan escolar
Pa di promer el a “schuif” su responsabilidad pa Minister di Husticia y Alto mando policial. Na di dos lugar Aruba ta confrontando olanan di ladronicia tur dia y no solamente na scolnan pero e Minister di Husticia no tin esaki bou di su control tampoco! Pregunta ta keda kico e por haci anto? Wel ora cu a fiha e presupuesto 2014  nan tawata sa caba cu pa hopi tempo cu e facilidadnan di nos scolnan ta “target” pa ladronnan pero a dicidi di corta den gastonan di siguridad di e facilidadnan! Aki tawata hustamente unda cu cosnan por a bay diferente pasobra e realidad ta cu facilidadnan escolar no ta hayando e proteccion.

Demotivacion
E negligencia no ta keda limita na e parti ladronicia so pero tambe e hecho cu varios scol te dia di awe no a ricibi un bishita di inspeccion pa mantenemento di nan edificionan. Tin varios scol cu ta den estado deplorabel y lamentablemente e atencion tampoco e accionnan necesario ta tuma lugar! Colegio San Antonio mes ta un ehempel di esaki. Si bo tuma nota di e estado di e facilidadnan temporario di e scol aki bo lo puntra bo mes si acaso esaki ta manera pa eleva calidad di enseñansa? Logicamente cu no! Ta e estado fisico ta pone un docente duna mihor les of pone e studiante studia mihor pero gobierno mester ta consciente si cu e factornan indirecto aki ta influencia y por demotiva ambos.

Nos di oposicion ta spera cu gobierno por cuminsa dedica e atencion y tuma e accionnan necesario riba e problematicanan aki. Ta incomprendibel cu ladronicia y negligencia mester yega asina leu y tin biaha ta warda “e baca caba di hoga” pa por core pensa riba solucionnan. Ta sumamente cuestionabel e forma con ta atendiendo cu e asunto aki y nos ta lamenta cu ningun persona ta asumi nan responsabilidad door di “gara e toro na su cacho”! 

Expresionnan haci den e articulo aki no necesariamente ta refleha opinion di ArenaPoliti.co