MEP: MEP a scapa pueblo di efecto di medida 'koersmarge vergoeding'
Diahuebs ultimo Parlamento a trata e ley pa duna Banco Central e autoridad di cobra e 'koers marge vergoeding' riba compra y benta di devisas. Esaki ta wordo cobra for di e 4 banconan comercial, pero fraccion di MEP tabata preocupa cu e banconan ta bai cobra e cliente y cu e ora e medida aki atrobe ta afecta pueblo. Di otro banda Fraccion di MEP ta compronde cu Banco Central mester di un fuente di entrada strctural.
Parlamentarionan di MEP durante e reunion a delibera pa por logra un compromiso di Gobierno cu e cobransa aki lo no wordo carga na e cliente. Pesey MEP a entrega un mocion, cu a wordo sosteni door di tur Parlamentario, tanto di AVP como PDR. "Cu e mocion aki nos a logra scapa pueblo di efecto di e medida aki. Mirando tur e medidanan cu e gobierno aki tin pensa di implementa den e sigiente temponan, y mirando tur e medidanan cu nan a implementa caba, ta nos deber y responsabilidad pa scapa nos cuidadanonan di e medida aki. Mi ta hopi satisfecho cu henter Parlamento a sostene e mocion aki, y mi ta gradisi nan tambe pa por a pone diferencianan politico un banda, y pone e pueblo di Aruba central. Ohala nos por haya nos mes riba e mesun linea den e sigiente dianan, cu e demas medidanan" lider di MEP Evelyn Wever-Croes a duna di conose.
Expresionnan haci den e articulo aki no necesariamente ta refleha opinion di ArenaPoliti.co