Cu obhetivo pa rescata y maneha propiedadnan di balor historico, monumental y cultural 

ORANJESTAD – Otro iniciativa di Gabinete Mike Eman ta haya sosten amplio den comunidad y a bira un realidad diabierna ultimo na momento cu a firma acta notarial pa formacion di ‘Renobacion Aruba N.V.’ E entidad legal a keda institui cu participacion di varios instancia financiero local cu e meta pa rescata propiedadnan rond di Aruba cu tin un balor historico, monumental of cultural. Consecuentemente Renobacion Aruba N.V. ta restaura y maneha e edificionan aki creando fondonan pa sigui realisa e funcion den futuro. Na mesun momento ta motivando e economia local y aportando na e proceso di renobacion di nos isla.

Minister President Mike Eman a comenta durante e ceremonia cu a tumaluga den sala di Conseho di Minister, cu e concepto ta uno similar naloke a sosode exitosamente na Hulanda pa medio di 'Stadsherstel Amsterdam' y mas cerca tambe, na no isla ruman di Corsou, cu e entidad 'Stadherstel Willemstad'. Diferente na e dos ehempelnan aki, e partidonan envolvi na Aruba scoge pa dun’e nomber di e pais y no djis e capital, pa asina e por cubri tur bario den henter e isla. “No kier a limita e iniciativa na unicamente na edificio den centro di ciudad, pero unda rond di Aruba cu por tin edificionan monumental pa cumpra e edificionan aki unda ta menasa cu nan por bay perdi,” segun Premier Eman.

A tuma mas of menos cuater aña for di momento cu Gobierno a presenta e idea na sector priva. Manera sr. Diego Frankel, director di Fatum Life Aruba N.V. a bisa, “e tabata un proyecto basta compleho. Mi ta sumamente contento cu tur a mira e bon causa cu nos por haci cu e entidad aki pa mehora Aruba y mi ta yama Aruba pabien!” El a fungi como Project Manager. Prome Minister Eman a gradici tambe Marielsa Croes y Jonathan Nisbet pa nan contribucion balioso na e proyecto.

Ademas di Fatum Life, otro accionistanan di Renobacion Aruba N.V. ta Caribbean Mercantile Bank N.V., Aruba Bank N.V., Ennia Caribe Leven (Aruba) N.V., Stichting Algemeen Pensioenfonds Aruba, Romar Enterprises N.V. y un accionista particular, esta sr. Serge Mansur, kende ultimo tambe a keda elegi pa fungi tambe como e prome director di e entidad. Den nomber di Gobierno e acta a wordo firma, den presencia di notario mr. Ralph Yarzagaray, pa Minister di Finanzas, Angel Bermudez y Minister Paul Croes como Minister interino di Infrastructura.

Sr. Javier Wolter, director di Caribbean Mercantile Bank a expresa na final di e ceremonia, cu su banco ta masha orguyoso di por participa den un proyecto asina importante. “Como banco nos ta wak hopi kico ta bon pa sociedad y esaki ta algo bon pa nos sociedad.” Di part di Ennia Caribe, sr. Erwin Croes a reitera e mesun pensamento y a indica cu “e ta un bon iniciativa pa sector priva participa.”

Gobierno su contribucion na e capital di Renobacion Aruba N.V. ta e traspaso di un propiedad situa na Emanstraat #39 conoci como ex-Voogdijraad. Pero Minister President Eman a remarca cu algun decada prome e edificio aki a fungi tambe como sede di Eilandsraad y un poco despues, como sede di Bevolking (Censo), entre otro funcionnan pa nos pais.

Minister Bermudez a remarca su satisfaccion recordando con un trinta aña pasa, un tipo di matrimonio asina entre sector priva y sector publico a trece cu por a lanta entre otro e companianan Air Aruba y Aruba Investment Bank (AIB). “Mi ta contento cu atrobe por mira cu, ora tin e necesidad, ta uni na bienestar di pais Aruba,” e mandatario a declara.

Expresionnan haci den e articulo aki no necesariamente ta refleha opinion di ArenaPoliti.co