Ken ta skibi articulo sushi pa e minister?
Minister Michelle Hooijboer-Winklaar siman pasa a duna un reaccion contra lider di MEP den cual el’a demostra su cara berdadero. Un reaccion sushi y yen di odio. Algo cu ningun hende por a kere di e minister, mirando cu e minister aki semper tabata un dama, netchi y al caso.

Sin embargo e malesa di EMAN a yega na su porta tambe, y e tambe mester saca su gal contra lider di MEP un dama di berdad sra. Evelyn Wever-Croes.

Michelle a rabia cu medionan di comunicacion a hinca su casa den e escandalo di seguro di studiante? Awel, mustra curashi manera líder di MEP a demostra: Sali mesora y aclarea e situacion. Despues e casa mes mester a sali defende su mes, mescos cu casa di líder di MEP. Y si ainda esey no ta suficiente, e casa mester a cuminsa un caso, mescos cu casa di Evelyn Wever-Croes a hasi, y a pone DIARIO paga sumanan cuantioso na danjo y boet.

Pero Michelle a prefera di keda keto pa mas di 3 siman, y despues di 3 siman ta saca su gal riba lider di MEP. Un reaccion negativo y yena cu odio. Un comunicado di prensa masha baho mes.

Y den su sed di odio y venganza, e minister a comete e eror di mas grandi di su carera: ela core manda e comunicado sin finalise, y asina bo por lesa cla y raspa ta cuanto hende ta traha riba e comunicado. Tambe bo por mira exactamente cual di e personanan cu ta traha na e compañía di mercadeo cu e minister ta paga pa skibi articulo pe, a hinca e veneno den e articulo. Periodista cu supuestamente ta cana cu cara masha respeta den comunidad ta wordo paga miles y miles di florin di placa di pueblo pa asina saca gal y veneno riba policonan oponente? Ta pesey placa di pueblo mester wordo gasta?

Minister Michelle Hooijber-Winklaar no por cu tanto presion. E no ta sirbi como minister di ensenjansa, e no a hasi net net nada pa ensenjansa, otro cu gasta millones di florin bishitando scolnan y saca potret. Ta obvio cu e senjora aki no ta wanta mucho mas den política, dje tanto interes e no tin tampoco den política ni gobernacion. E reaccion sushi aki, y e forma cu el’a saca su gal riba líder di MEP ta un prueba cu su fuse ta den bula.

Expresionnan haci den e articulo aki no necesariamente ta refleha opinion di ArenaPoliti.co