Prome Minister a cana den Sabanilla Abao  y Santa Lucia, entre otro     

ORANJESTAD - E prome bario pa haya bishita y atencion personal di Minister Presidente Mike Eman den cuadro di e programa Accion di Bario, tabata e bicindarionan di Santa Lucia, Sabanilla Abao y Ayo. Diahuebs mainta a cana hunto cu personal di GKMB, Serlimar, Bo Bario y City Inspector cu ta percura pa atende e necesidad particular di e habitantenan.

Tempo tabata ideal cu un solo no hopi fuerte y e dushi biento di region aki di e isla. E awacero ocasional no a stroba, pero mas bien a wak como un bendicion bon bini. Na cada cas riba e ruta, Premier Eman tabata haya un ricibimento caluroso y e di su banda a sa di scucha e comentario y peticion di e ciudadanonan.

Mientras esaki ta tuma luga, departamentonan publico ta haci control pa muskita, ta wak si tin sushinan cu por bay cune; y si ta necesario, tambe ta tuma informacion pa gestiona cu otro departamentonan manera Asuntonan Social, Impuesto, etc.

Ricardo Kock y Charlie Koolman ta dos di varios habitante cu a compaña Minister President Eman den e trayecto cu a cubri e caminda di tera cu ta subi y baha e seroenan, yegando na e casnan di mas isola pa asina percura cu ta yega den tur skina di e bario. Nan ta guia y brinda un miho comprondemento di con e bario ta hinca den otro, kende e bisiñanan ta, etc.

Accion di Bario ta un constante den e agenda di e mandatario durante henter su gestion di maneho. Ta di e manera aki ta conoce kico ta come y bebe den curason di nos pueblo. Den transcurso di e programa, ta calcula cu Prome Minister Eman a yega a realisa riba 80 accion cubriendo tur districto di e isla y tin mas di 1.800 bishita registra na cas, hogar y famia.

Mescos cu den e caso di Sabanilla Abao, hopi biaha ta coordina e Accion di Bario y ponemento di luz. Diahuebs anochi ta bay pone e prome luz LED den bario, pa algun bisiña, algo cu tin mas di 20 aña ta warda riba dje. 

Expresionnan haci den e articulo aki no necesariamente ta refleha opinion di ArenaPoliti.co