Minister Bermudez ta comenta riba BAZV: “Control team lo subi caya pronto pa sigura cu impuestonan ta wordo cobra debidamente”
Relaciona cu e carta cu Camara di Comercio (KvK) a manda pa Minister di Finanzas, Angel Bermudez siman pasa tocante e confusion cu ta reina en cuanto e aplicacion di BAZV, e mandatario a dicidi di bolbe reuni cu e directora di Departamento di Impuesto y hunto nan a yega na un acuerdo cu den un termino corto lo ripiti e sesion di informacion tocante e aplicacion di BAZV.
Remarcabel ta cu aunke cu BBO ta existi pa basta aña caba, e BAZV cu ta colga na e BBO (pues ta mesun sistema) cu e tarifa di 1%, aparentemente ta trece asina tanto dificultad pa comercio den su ehecucion.
Minister Bermudez personalmente a observa cu hasta companianan di Gobierno ta aplica e ley na un manera robes, pasobra mescos cu e ley original di BBO, e BAZV no mester wordo calcula riba ningun factura, como si fuera ta un impuesto cu ta cobra e consumidor.
“E BBO y BAZV ta wordo cobra riba e comerciante y no e consumidor”, e mandatario a indica. Minister di Finanzas ta sigui splica cu e unico cos cu e ley di BAZV ta exigi ta un frase riba e factura cu ta indica cu loke ta wordo cobra pues e montante final pa paga tin BZAV inclui. Ta trata aki di e 1% di BAZV inclui caba y no e calculacion mes, paso e consumidor no tin nada di haber cu esey.
“BAZV igual na BBO no ta un ‘final’ sales tax, pero e ta un cobransa riba e benta mensual di e comerciantenan”, Minister Bermudez a splica.
Finalmente, e directora di Belastingdienst a informa e mandatario cu nan ta preparando un campaña di control y cu pronto e ekipo di control aki lo subi caya pa controla den comercio si e leynan di Loonbelasting, AZV, BBO y BAZV ta wordo aplica segun ley ta indica.
Expresionnan haci den e articulo aki no necesariamente ta refleha opinion di ArenaPoliti.co