Evelyn Wever-Croes (MEP): Formacion politico desde hoben ta e yabi pa un futuro briyante
ORANJESTAD -- Diaranson ultimo un delegacion di e hobennan di hala hubenil HOT di partido MEP a hasi un bishita na Parlamento. E bishita a wordo organisa pa lider di MEP Evelyn Wever-Croes y presidente di HOT Lyonell Dirks.
"Nos ta agradesido na presidente y griffier di Parlamento pa permiti e bishita aki. Nos a splica e hobennan e tarea di Parlamento. Griffier di Parlamento tambe a duna un splicacion, y cada Parlamentario di MEP a duna un splicacion di nan trabou y responsabilidadnan den Parlamento.E tabata un encuentro realmente positivo cu nos hobennan.
Pa nos e bishita ta sumamente importante. Pa cuminsa ta prome biaha cu un hala hubenil di un partido politico ta bishita Parlamento. Esey ta mustra cu pa nos di MEP, nos hobennan y nan formacion ta prioridad. Mientras otro partidonan ta organisa un fiesta tras di otro, nos ta combina entretenimento cu formacion politico. E bishita aki ta importante pasobra e ta mustra e importancia cu nos ta duna na e formacion di nos hobennan. Un hoben cu ta interesa den politica, mester conose e fundamento constitucional, y den e caso aki Parlamento ta e curason di nos democracia. Si e formacion di nos hobennan ta bon, esey ta e yabi pa un futuro briyante" lider di MEP Evelyn Wever-Croes a duna di conose.
Expresionnan haci den e articulo aki no necesariamente ta refleha opinion di ArenaPoliti.co