Glenbert Croes: MEP y pueblo ta adverti valero cu nos lo no permiti desmantelacion
Nos a tuma nota di e noticianan cu a sali unda cu Valero Energy Corporation a pone diferente process units di e refinería di Aruba na venta. Nos kier ta categorico: Pueblo y MEP ta considera e noticia aki un provocación di Valero contra nos Digno Pueblo y nos ta manda e ultimo advertencia na Valero cu MEP y PUEBLO DI ARUBA LO NO PERMITI VALERO DESMANTELA E REFINERIA.
Partido MEP ta convenci cu nos lo logra e reapertura di e refinería manera e Gobierno di MEP di Gabinete Oduber 1 a logra negociando cu Coastal Corporation. Fundamental pa nos logra esaki ta cu Valero MESTER traspasa e refinería pa Gobierno di Aruba manera Exxon-Esso a hasi esaki na anja 1985 bao di e Gobierno di MEP lideriza e tempo ey pa nos Libertador Betico Croes.
Ta nos convicción cu Valero ta strobando e reapertura di e refinería por lo cual tanten cu Valero di e refinería niun Gobierno por logra habrie bek.
Nos ta ripiti nos mensahe na Gobierno: Parlamento di Aruba y Gobierno mester forma un bloke pa para Valero y exigi e traspaso di esaki pa Pais Aruba. Inmediatamente después di traspaso nos lo usa e modelo di Corsow unda a funda un compañía 100% di Gobierno di Aruba cu lo ta donjo di refinería y Gobierno e ora lo yega acuerdonan di cooperación estratégico di inversión cu companianan manera PDVSA, ECOPETROL, PETROBRAS, PETROTRIN, SYNOPEC, PETROCHINA etc.
Nos ta convenci cu tin dos coriente den Gobierno: esun di Minister Mike De Meza cu kier habri e refinería kende por conta cu sostén di MEP pa nos logra e reapertura di e refinería. E otro coriente den Gobierno lideriza pa Minister President Mike Eman cu kier desmantela e refinería pa asina otorga e terreno y e waf di e refinería na AVP y su Grupito cu kier hasi nan mes donjo di Aruba a costo di e sufrimento di henter un Pueblo. MEP y nos Pueblo lo bringa e coriente di Mike Eman complice di Valero pa desmantela e refinería CUESTE LOKE CUESTE TE NA FINAL TE ORA NOS VENCE.
Gobierno ta notifica y Valero ta adverti. BOSO LO NO DESMANTELA E REFINERIA.
Glenbert F. Croes
Miembro di Parlamento
Fraccion di MEP
Expresionnan haci den e articulo aki no necesariamente ta refleha opinion di ArenaPoliti.co