ORANJESTAD – “Economia ta recuperando di un dobbel recesion causa pa e crisis financiero mundial y ceramento di refineria”, asina IMF ta inicia e texto di su declaracion na final di e mision cu a conclui diabierna ultimo. Un mision cu a resulta masha constructivo pa Aruba, sigur despues di e situacion dificil cu Aruba a haya su mes confronta cu ne cu un crisis mundial na 2008 azotando mundo y un refineria cu a cera. Mester a bin rapidamente cu un plan pa cuminsa cu un recuperacion fuerte. E situacion na Aruba no tabata nada bon na momento cu Gabinete Mike Eman I a tuma rienda di pais Aruba. Mesora na su entrada na final di 2009 Gabinete Mike Eman a wordo confronta directo y duro cu e consecuencianan di e crisis economico mundial y ciere di e refineria.

Recuperacion di economia. E crisis economico a dal Aruba duro cu un caida di 15% den e periodo 2008-2010; tres bes mas hopi cu e efectonan di e crisis economico na Hulanda. Entradanan di gobierno a cay cu 30% y e cifra di desempleo a surpasa 10%, tabata gasta menos placa y e clima di inversion tabata debil. Cu fe den propio forsa, gobierno a busca e balansa entre ehecucion di reformanan di un banda y stimulacion di e crecemento economico di otro banda. Mester a traha rapidamente riba un plan di recuperacion pa drecha loke no tabata bon. Recuperacion di economia a duna resultado positivo. Esaki IMF ta bisa cu tanto palabra. “Despues di un recuperacion fuerte y gradual di un dobel recesion – ciere di e refineria y e crisis mundial – economia di Aruba a crece na 2013 cu 4 ½ %. E dimension di actividad a sigui modera na 2014 y espectativa ta cu na 2015 e crecemento aki ta continua cu 2 ¼ %.” Desempleo tambe  a baha y tin cifranan cu ta comproba esaki.



Pa loke ta gasto a efectua cambionan structural den seguridad social -- individualisacion di prima, ampliacion di base, aumento di edad di pensioen te cu 65 aña como tambe aumento di prima -- mescos tambe e haci cambio den e pensioen di empleadonan publico -- di eindloon pa middelloon, a inclui e franchise den e base di pensioen y a hisa edad di pensioen te cu 65 aña – como tambe a introduci flexibilisacion di edad di pensioen, a austerisa e beneficionan di pensioen di dignitarionan politico y introduci un impuesto pa cubri parti di e gastonan di AZV. A introduci un ley di pensioen general obligatorio, garantisando asina un pensioen adicional pa empleadonan den sector priva banda di AOV. Di e forma aki ta limita demandanan den futuro pa reformanan adicional, pero ta garantisa un pensioen sigura pa un y tur. E pasonan fuerte aki tabata posibel door di amplio discusion social den e Dialogo Social. Di e forma aki por a tuma den un tempo cortico decisionnan compleho y tin bes sensitivo cu un impacto duradero y positivo riba finanzas publico, sin cu tabatin discordia social.  

E declaracion final di e mision IMF ta subraya cu Aruba ta riba e bon caminda y ta bayendo pa un nivel di prosperidad y bienestar mas halto riba termino medio largo, na unda solidez di su futuro ta wordo sigura pa un desaroyo bon pensa y duradero economico (Smart Growth) y un maneho solido financiero di gobierno. E efectonan positivo di rebaho di gastonan  y stimulacion di e economia acopla na restauracion di turismo y dor di haci gastonan di capital duradero, ta forma e base pa un recuperacion di economia di Aruba y ta kita for di caminda  e consecuencianan di e periodo di e caida na 2008-2010. Analisando e declaracion final di e mision di IMF di diabierna ultimo por conclui cu e plan di recuperacion di Gabinete Mike Eman a mustra di ta efectivo.

Expresionnan haci den e articulo aki no necesariamente ta refleha opinion di ArenaPoliti.co