Mike Eman y e miembronan di su pandiya a bolbe celebra fiesta na grandi den e luna cu a pasa januari; den nomber di e Pueblo Arubano mi ta bay tiranan cu tomati putri, y esey ta bay den e siguiente secuencia.

Tomati putri nr. 10 ta bay pa Doble P., Paulito Permiso.
Esaki ta e minister cu ta deal, of ta laga deal, den permisonan di trabao; su abogado a scirbimi un carta pa informami cu Paulito Permiso ta pensando pa cuminza un caso contra mi persona, y ela puntrami si mi por a confirma cu ta ami ta esun cu a scirbi e articulonan fastioso ey riba su cliente Paulito Permiso. Sigur un pregunta straño, pasobra Solo di Pueblo semper ta scirbi cu leternan masha grandi y diki: PAGINA JAN DE RUIJTER riba mi articulonan.
Paulito Permiso tabata kier a blaf un rato, pero lamentablemente por lo demas e no a haci absolutamente nada, y asina un biaha mas algun miles di florin mester wordo paga absolutamente innecesariamente for di placa di belasting di nos Pueblo na un abogado, djis pa scirbi un carta pa un gobierno cu no tin placa!
Mientras tanto Paulito Permiso a otorga algun cientos di permiso di trabao na trahadornan di exterior, esta for di Venezuela y Sto. Domingo, pa e di dos Hotel Riu, unda un miserabel cantidad di 8 (ocho!) trahador procedente di e antiguo Hotel Westin, a wordo emplea atrobe for di e 12.000 (12mil!) desempleadonan riba Aruba.
Pero, Paulito Permiso tin e corahe y pudor di declara cu aña 2015 ta bay bira un bon aña cu menos desempleo, esaki en bista di e hotel Bahia Principe na San Nicolas, di cua por cierto e construccion mester a cuminza na luna di januari 2015, esaki di acuerdo cu su colega-papiador di nonsense Otto “whatever”.
Paulito Permiso lo a papia tambe cu Banco Mundial (Wereldbank), cu ta duna hopi sosten financiero na paisnan pa combati pobreza, .... pero cu prome cu haci esey, ta pone exigencianan hopi severo pa cu corupcion.
Wel, Banco Mundial a pasa Aruba “voorbij” masha liher mes; Paulito Permiso no tabatin ni e minimo chens; na Hulandes crioyo bisa: Paulito a “druip als een baksteen”! Of: Paulito a “sla een figuur als een gieter”!
Pero, locual ta pio: Aruba a perde cara!

Tomati putri nr. 9: Arthuro, e criminalidad “Doordouwer”
Di berdad mi a hari mi barica yen, ora mi a weita e cabez triunfante di Arthur Dower riba pantaya di television; nunca antes mi a yega di weita un persona cu un mirada asina triunfante .... di awor padilanti nunca mas e tin mester di traha .... pasobra no tin placa!!!! E tin asina hopi gana di combati criminalidad, y di drecha tur cos, .... pero lamentablemente e no por haci nada, pasobra hecho ta cu NO tin placa, pues su mannan ta mara; e mes no por haci nada mas, y esey ta duel e hopi; nunca antes mi a yega di weita un hende cu un mirada asina glorifica y apasiona; .... e homber tin tur cos cla y regla caba, e no mester haci nada mas, pasobra no tin placa. E ta cla!! Tambe e kier kita tur drogadicto for di riba caya, pero ela lubida cu esey ya caba na aña 2008 y 2009 AVP a priminti comercio.
Ah, Dios, berdad: ela papia tambe di e “klachtencommisie” (comision pa keho) unda pueblo lo por a denuncia actuacion malo di polis; e ta bay cuminza cu esey e aña aki ainda, y mientras tanto pueblo por acudi cerca dje mes personalmente pa expresa nan kehonan; e mes ta bay investiga e casonan, y pueblo semper lo por conta cu un reaccion di dje ..... contal cu tin placa pa por cumpra papel, claro!

Tomati putri nr. 8: Minister Bermudez ta laga haci un investigacion.
Anuncionan grandi: riba encargo di gobierno lo bay tin un investigacion riba condicionnan di trabao (“arbeidsvoorwaardenonderzoek”) pa loke ta trata e structuranan di salarionan den e aparato di empleadonan publico, esaki pa yega na un organisacion di gobierno bon prepara, profesional y dirigi riba e cliente. Ta mas cu claro cu esaki mester ser realisa door di Deloitte, pa colmo precisamente e organisacion cu ainda ta duna les den management cu materialnan cu ta data for di tempo di e mashin di vapor, di couchi boulo!
Ay, berdad, prome cu mi lubida: si e minister aki tira un bista un rato den lachi di su lessenaar, e lo haya eyden den careda di 20 raport di estudionan anterior cu ya a tuma lugar riba exactamente mesun materia.
Gobierno di Aruba: un organisacion prepara....un tomati grandi, gordo, y putri!!

Tomati putri nr. 7: un Poppenkast nobo pa Mike, e Eman trastorna.
Mike ta keda persisti y persevera: .... su cuerpo di conseho fiscal mester bin, y lo bin. Mike gusta co’i hunga, auto por ehempel, y awor e kier un poppenkast acerca. Esaki lo bira un cuerpo completamente independiente unda 2 di e tres miembronan lo ta nombra door di gobierno di Aruba y kendenan lo mag di hunga un papel di consehero, mescos cu nos Raad van Advies y e Algemene Rekenkamer. Mike ta wordo trastorna completamente door di Hulanda, y ata e miembronan di VVD’ers cu no ta weita nada aden!

Tomati putri number 6: Conchita Wurst y e bida sexual di Mike, Otnar, Tico, Prins Abath y semehantenan.
Ta haci algun diferencia? Sigur cu si! Bo por corda e tempo ainda cu nos tabata kier hendenan nechi y decente den nos gobierno? Casi bo no ta corda, no? Ta pasobra esey tabata asina hopi tempo pasa, toch? Pero e hendenan sexualmente trastorna aki ta trastorna tambe den nan bida diario, y ta p’esey esaki a pesar di tur cos sigur ta toca nos tambe. Den exterior esaki no ta nada diferente. Na Francia recientemente e conocido politico Dominique Strauss-Kahn a haya skopnan formal den su atras pa motibo di su scandalnan sexual, y awor ta Principe Andrew di Inglatera cu ta haye confronta cu un situacion similar.
Pero mi tin un bon conseho pa nos Mike sexualmente trastorna: mas oro, ora cu AVP kitabo for di riba e lista, bo mester invita e cantante di Austria, Conchita Wurst; mi no sa pakiko su nomber adapta ta “worst”, pero e homber ey ta un muher. Of den realidad e ta un muher cu un barba di un homber. Posibelmente e lo por yuda Mike cu su trastorno desespera, awor cu ni bo psiquiatranan no sa mas kiko ta kiko cu bo. Purbe pa un fin di siman, cu worst pa desayuno mainta tempran.
Cu placer mi ta corda e tempo cu na Aruba nos por a conta cu hendenan normal y decente como mandatarionan, manera Gezaghebber Jossy Tromp y Diputado Daniel Leo, hendenan decente y nechi cu tabata traha duro, y cu semper tabata para cla pa nan isla!

Tomati putri nr. 5: E fraudenan di luna.
Si, ta berdad! E luna aki gobierno ta score fantasticamente halto cu esakinan.
Paulito Permiso ta firma cartanan di excepcion contra bon pago, y e clientenan aki e ora ey no tin mester di presenta na e departamentonan di trabao, manera “job center”, pa e screening obligatorio. Di acuerdo cu informacion e prijsnan ta varia for di 1000 dollar pa 6000 florin, y e nombernan di e coordinadornan ta conoci.
Aparentemente e benta den e negoshi aki ta yega den careda di 30 permiso pa dia; bo ta comprende awor e smile grandi riba e cara di Paulito Permiso den tur corant?
Naturalmente ainda nos tin Michelle de Insurance-Winkelaar cu su “Insure To Study”; Michelle ta nenga, pero e caso ta leu di bay den e famoso doofpot, pasobra awe datonan nobo a bira conoci. Nos lo tenebo informa.
Tambe nos tin ainda e caso di e miembronan di directiva di Lotto di Deporte, cu ta gasta 72.000 florin pa ekipo di seguridad, cada un costando 13.500.00 florin, mientras cu na PriceSmart nan ta costa 875 florin!
Casi mi a lubida e señora di nos “estimado” dr. Visser, Aysel Erbudak, kende awor mester paga back un “miserabel” 1.7 miyon euro na un hospital na Amsterdam.
Tampoco mi mag lubida Alex Tromp, kende awor en adilante mag bay campa y keiro den Parlamento, pasobra gobierno no tin bastante personal toch??

Tur esaki den un solo luna, y ainda esaki tabata un luna “rustig”!

(e ta sigui)

Jan de Ruijter
Aruba, februari 17, 2015
This email address is being protected from spambots. You need JavaScript enabled to view it.

Expresionnan haci den e articulo aki no necesariamente ta refleha opinion di ArenaPoliti.co