Rene Herdé (AVP): Reino tin mester di un maneho pa desaroyo enbez di un maneho di conflicto
![Herde08](/images/779x490/Herde08.jpg)
Loke nos ta wak ta sosode den Reino awor aki ta netamente loke nos no tabata kier. Loke tin awor aki ta un maneho di punta dede y crea conflicto. Loke nos ta boga pe ta un maneho cu ta stimula desaroyo y fortificacion riba tur tereno. Rene Herde': "E maneho hopi mas racional, efectivo y cu ta respeta Statuut, ta pa hunto desaroya e capacidad y conocemento cu falta den e paisnan di Reino. Algo cu sigur Aruba a pidi pe y lo sostene. Gobierno di Parlamento di Aruba ta convenci cu nos mes mester por atende cu tur asunto cu ta responsabilidadnan di un pais autonomo, democratico, responsabel y cu kier e miho riba tur tereno pa su hendenan. Un maneho asina pa Reino lo por door di fiha norma y metanan concreto riba tur tereno cu ta haya necesario. E normanan aki lo mester conta pa tur pais di Reino y hunto ta traha pa logra esakinan y sigura cumplimento cu nan. Nos a sugeri esaki por ehempel riba tereno financiero na mas cu ocasion, pa motibo di e discucion cu Hulanda riba maneho di finansa publico y desaroyo social y economico na Aruba. E desaroyo y maneho aki ta algo cu Pueblo di Aruba y su representantenan mes mester determina. No algun parlamentario sinta na Den Haag. Pa evita un discucion sin final, nos a sugeri pa hunto nos fiha normanan cu nos tur ta tene na dje y pa yuda otro pa cumpli cu nan. E sistema aki ta funciona cu organonan internacional riba tereno financiero y di husticia. Pakico e forma di traha aki no lo funciona den Reino. Ta e diferencia den forma di wak Reino y e boluntad pa haci'e ta stroba." Segun Rene Herde' e forma di purba regla tur cos for di Den Haag y sin tene cuenta cu nos den otro parti di Reino, no a funciona y no lo funciona. Tampoco por goberna via KB y decretonan unilateral. Na Hulanda e forma di desicionnan aki ta wordo considera totalmente anti-democratico. Dicon serca nos si lo mester accepta esaki? Rene Herde':"No por sigui cu discucionnan sin final riba tur sorto di tereno sin un vision comun pa Reino. E unico cos cu e ta haci ta daña e relacionnan entre paisnan. Nos ta perde masha hopi tempo valioso, sin cu e ta hiba nos na solucion. Mester cambia e forma di traha aki y fiha norma y metanan pa henter Reino cu nos tur hunto ta traha pa realisa y mantene." Durante di e siguiente reunionnan entre parlamentonan di Reino na fin di mei awor, e tema aki lo mester wordo trata segun algun miembro di Parlamentonan di Aruba, Corsow y Sint Maarten.
Expresionnan haci den e articulo aki no necesariamente ta refleha opinion di ArenaPoliti.co