UPP algun tempo pasa a premira y pronostica cu e presupuesto 2015 lo bay nifica un guera atrobe entre e gobierno di Aruba y e Rijksministerraad.
E motibo ta mas cu obvio, ya cu deliberadamente e gobierno di Aruba ta keda insisti di aumenta e gastonan di pais Aruba, pa keda cumpli cu promesanan haci na financistanan di e campañanan, manera ta tuma lugar na WEB, Serlimar, Airport (solar panels), Urirama y proyectonan di construccion di hotelnan pa loco, Green Corridor, e spartmento di klinkers tur caminda, y no lubida otorgamento di contractnan lucrativo na compinchinan sin ningun destaho publico, particularmente den e mundo turistico, y festivalnan musical.
Un otro splicacion UPP no tin, pasobra ta prefera di masacra e pueblo humilde cu medidanan enbes di presenta, di un forma transparente y honesto, e situacion financiero di Aruba den e presupuesto 2015. Raad van Advies y CFT a declara di un forma contundente cu gobierno a presenta un presupuesto cu no tin mucho diferencia cu esun di 2014. Un presupuesto basa riba cifranan ficticio, na unda e dos instancianan ta expone cu no tin un bon plan di maneho (beleidsvoornemens), y ni tampoco un hustificacion y aclaracion financiero.

Kico ta e modus operandi di partido AVP?
Na prome lugar Mike Eman ta cuminsa un contra-atake door di cuminsa promove y propaganda su maneho den medionan di comunicacion, principalmente esnan comprometi y paga door di su gobierno.
Despues e ta laga e “Angel Wardador” haci declaracionnan confuso na e mesun medionan di comunicacion, cu e unico proposito pa bruha nos pueblo mas ainda. Un prueba di esaki ta e “koersmargevergoeding”, na unda deliberadamente ta neglisha un mocion tuma unanimamente den parlamento di Aruba pa no pasa e gastonan di e medida aki pa e consumidor.

Pero e manipulacion y proposito pa sigui bruha nos pueblo no a caba aki. Awor a cuminsa laga parlamentarionan y prensa comprometi cuminsa un campaña di polarisacion di nos cuerpo di empleadonan publico.
AVP ta culpa oposicion cu nan kier kita 2500 ambtenaar di trabou, siguiendo asina e recomendacionnan haci door di CFT.
Pero no ta e ex-minister di finansas y miembro di partido, y parlamentario pa AVP, esta J.D Yrausquin, ta esun cu como presidente di ATIA a laga sa cu mester kita 1500 ambtenaar for di trabou? No ta e exponentenan di AVP a hiba un campaña tenaz na 2009, na unda a indica cu mester mehora e relacion cu Madre Patria?? Un relacion cu segun Mike Eman a deteriora durante e gobierno anterior? No ta Mike Eman a bay den un huelga di hamber, y a denuncia publicamente e abuso (verkrachting) cometi door di Hulanda?

E guera sigur lo yega na un culminacion despues di aprobacion di e presupuesto 2015 door di e 13 marionetanan di AVP den parlamento, pasobra no a cumpli cu e palabracion haci den e protocolnan di “Witte Donderdag”, ni tampoco esun di e “Balanced Budget”.
Tampoco a incorpora debidamente e 24 medidanan cu supuestamente a keda acorda pa cu ehecucion di e presupuesto 2014, y na final di cuenta e gobierno tampoco tin e intencion di baha e gastonan di operacion di e aparato publico. Enbes di pone su prioridadnan di un forma corecto door di entre otro reduci e cantidad di minister, coordinador, biahamento y propaganda, a prefera di sigui cu e empeño pa reduci e cantidad di empleado publico cu plannan manera VUT (cu ta un fracaso).

Den un articulo anterior ya caba UPP a bisa cu e empleado publico ta e unico sector cu pa casi 100% ta consisti di Yuinan Di Tera, y cu 100% di nan entrada ta wordo gasta aki na Aruba mes, contrario na esnan den sector priva cu gran parti di nan entrada ta bay pa exterior pa mantene nan famia na nan pais.

Den UPP su programa di partido ta bisa cu mester bin un organo independiente pa ora di nombracion di un empleado publico, pues cu mester de-politisa esaki. Tur esaki basa riba principionan di "Good Governance". Den cuadro di esaki tambe UPP ta di opinion cu ora di nombracion di Directornan di departamentonan, y particularmente di esunnan vulnerable (p.e. Dimas, Belasting, Douane, Polis, Prison, Finanzas) mester tin un screening estricto y profundo haci door di e.o. VDA. Den pasado esaki a sosode caba den e.o. DIMAS, y mi ta spera cu den esunnan cu tin cu ser nombra pronto, esaki sosode tambe.
Den medionan social a ser bisa cu den e siman aki varios nombracion lo tuma lugar entre otro na Belasting y Douane. Ta di spera cu esnan cu ser escohi, ta esunnan miho prepara cu a pasa e screening aki, y cu particularmente no tin ningun investigacion ta tumando lugar riba nan.
Aruba ta den un situacion financiero economico deplorabel, y no ta permisibel pa laga faboritismo politico prevalece.

UPP ta e unico partido cu den su plan di gobernacion a publica di ta considera e empleado publico como un aliado importante pa mantene e economia di nos pais stabiel. E polarisacion cu e partido na mando kier eherce awor aki, no lo yuda den ningun forma pa yega na un solucion favorabel pa nos Pais, y tin unicamente como meta pa tira santo den wowo di nos pueblo, y no enfrenta e realidad cu ta e gobierno aki di Mike Eman ta esun culpabel pa e desaster financiero actual.

Den nomber di Union Patriotico Progresista – U.P.P.
Drs. Candelario A. S. D. – Booshi – Wever
Brazil, april 15, 2015

Expresionnan haci den e articulo aki no necesariamente ta refleha opinion di ArenaPoliti.co