Na januari 2014 a cuminsa un disputa entre Aruba y Hulanda debi na e situacion financiero di nos Pais. E Conseho di Minister di Reino a exigi claridad di Gabinete Eman riba e situacion financiero di nos Pais promer cu duna permiso na Aruba pa presta placa riba mercado internacional. Gabinete Eman a bay di acuerdo por medio di e carta di ‘geen bezwaar’ di 6 di februari 2014 pa cumpli cu e tres condicionnan cu Hulanda imponi. Pero un aña despues Gabinete Eman no a cumpli y pesey ainda no a resolve e disputa entre Aruba y Hulanda.

E Conseho di Minister di Reino a pone tres condicion pa Gabinete Eman por presta placa, 1. E presupuesto di 2014 mester tabata cla promer cu 1 di mei 2014 y mester duna un bista riba e presupuestonan di 2015 pa 2017, 2. E presupuesto mester contene e medidanan pa por yega na un presupuesto balansa teniendo cuenta cu e conseho di IMF y 3. Un instancia inparcial mester evalua e presupuesto di 2014 y locual ta ser premira pa 2015 pa 2017. Gabinete Eman por medio di ex Minister Yrausquin a bay di acuerdo cu e condicionnan aki den su carta di ‘geen bezwaar’ di dia 6 di februari 2014.

Un aña a pasa cu Aruba a bay di acuerdo, pero e disputa no a wordo resolvi. Gabinete Eman a presenta un presupuesto irealistico pa 2014, Hulanda a manda un KB pa CFT investiga, Minister Eman a bay den welga di hamber, e Minister di Finanzas a tuma su retiro, Gabinete Eman no kier splica con elo tuma e 24 medida cu nan mes a propone pa drecha e situacion financiero, Minister Eman no kier duna cara na Hulanda, CFT a bira permanente , Minister Bermudez no por tuma medida su so, no tin presupuesto pa 2015 y si no cumpli cu recomendacion di CFT no lo tin placa pa cubri debanan di nos Pais. Esaki ta e resultado te awor di e carta di ‘geen bezwaar.’ E disputa cu Hulanda riba nos finanzas publico no ta resolvi.


4 februari 2015

Expresionnan haci den e articulo aki no necesariamente ta refleha opinion di ArenaPoliti.co