E asunto di hedging na WEB mester wordo investiga profundamente. For di e feitenonderzoek cu a wordo haci tin basta punto cu merece un mihor splicacion di parti di esnan envolvi na WEB, Utilities y tambe for di Ministernan De Meza y Eman kendenan ta e mandatarionan responsabel pa locual a pasa na WEB. Un di e puntonan cu sigur ta hala atencion den e feitenonderzoek, ta e experiencia di esnan envolvi pa tuma decicion riba hedging. E feitenonderzoek ta mustra cu esnan envolvi cu hedging na WEB no tin suficiente experiencia.

E team di hedging no tin suficiente experiencia
Riba pagina 12 di e feitenonderzoek nos por lesa: “The Hedge Team which consists of four (4) individuals did not possess any experience with hedging prior to being part of the team. The Hedge Team received a training provided by Kase & Co from the 27^th of August till the 30^th of August 2012. Kase & Co through its call center further supported and advised the Hedge Team after the training in the execution of hedges. As of now the Hedge Team has 2.5 years of experience in managing the hedge program and in executing hedges activities. Cu otro palabra, e investigacion ta mustra riba e hecho cu e team di hedging tin solamente 4 dia di curso y un asistencia di un call center pa haci pregunta adicional. Aki ta na unda nos mester puntra si ta responsabel pa un team cu asina poco experiencia haya hedge full e necesidad di heavy fuel oil di WEB pa full 2015 y full 2016 den apenas un luna di tempo.

Management y Board di Supervicion tampoco tin experiencia relevante
Riba pagina 12 y 54 di e feitenonderzoek ta sali na cla cu e miembronan di e Management y e Board di Supervicion di WEB tampoco no tin experiencia relevante. Den e Management ta e manager encarga cu finanzas a tuma un curso relaciona cu e hedging cu a wordo haci promer cu 2009. E director general mes no a sigi ningun curso riba e tereno di hedging. Pa locual ta e Board di Supervicion ta un miembro so tin experiencia cu hedging den e context di risico di interes. Pues aki tambe nos mester puntra nos mes si tabata responsabel pa hedge asina agresivo sin conocemento di e materia di parti di esnan cu ta tuma decicion.

Utilities y Ministernan mester responsabilisa e falta di experiencia y e risico tuma
Como esun na cabes di e companianan di utilidad, WEB y ELMAR, e ehecutivonan di Utilities tambe mester por tabata na altura di e risico grandi cu e hedging di e manera agresivo aki ta trece cune. E pregunta ta, dicon nan a permiti pa hende sin suficiente experiencia hedge pa full 2015 y 2016? Ministernan De Meza y Eman den representacion di shareholder di e companianan aki tambe mester a percura y demanda cu esnan encarga cu hedging di e manera agresivo aki tabata conta cu e experiencia adecuado. E feitenonderzoek a wordo limita na e decicionnan tuma na WEB. Pesey Utilities y Ministernan De Meza y Eman debe Pueblo un splicacion con bin nan a permiti pa hende sin suficiente experiencia tuma un risico asina grandi na WEB cu awor ta perhudica full nos Pais.

22 maart 2015

Expresionnan haci den e articulo aki no necesariamente ta refleha opinion di ArenaPoliti.co