Promer Minister Eman keto bay ta papiando di 100% energia alternativo. Esaki no solamente no ta viable pa Aruba mucho menos recomendabel. Ademas ora abo kier papia di 100% energia alternativo bo mester tin e fondonan corespondiente pa haci esaki. Mester enfatisa riba e hecho cu te dia di awe gobierno mes no a realisa niun proyecto "berde" cu ta contribui na un forma positivo na comunidad.

Nos a expresa nos opinion relaciona cu e proyecto di Urirama y cu mester para esaki debi na caida di prijs di crudo. Hecho ta cu ningun proyecto alternativo actual di gobierno por beneficia Aruba. Nos a puntra minister de Meza tambe si e proyecto lo bay door. E contesta tawata cu cueste loke cueste e lo wordo realisa. E motibo cu mi a haci e pregunta ta pasobra cu molinanan di biento tambe por wordo considera como un tipo di hedging, pasobra bo ta mara na hopi aña y esaki lo por tin como consecuencia posibel perdidanan grandi. Mescos ta conta tambe cu e proyecto di panel solar na Airport.

Informacionnan adicional cu nos a ricibi ta cu Elmar lo bay ahusta tarifanan administrativo di ‘late fee’ entrante prome di Juli 2015. Ehempel di esakinan ta cu 2,50 florin ta bira 25 florin si paga laat y si esaki mester wordo reconecta e ta cambia di 50 pa 75 florin. Den caso cu e meter wordo corta e penalisacion lo bira 175 florin. Ariba un pregunta cu nos a haci na minister relaciona cu esaki, minister de Meza a admiti cu e mes a duna ordo pa aplica esakinan pero cu e lo bay retene por lo pronto. Nos di oposicion ta spera enbista cu esaki a wordo treci publicamente cu e lo bay cumpli cu su palabranan y asina retene e aumentonan por lo pronto.

Expresionnan haci den e articulo aki no necesariamente ta refleha opinion di ArenaPoliti.co