Minister Otmar Oduber a bishita FORMATUR na Cuba 

Durante e bishita diplomatico di Minister Otmar Oduber na Cuba, e mandatario a ricibi un presentacion di e scol conoci como FORMATUR. E scol aki ta cay directamente bou di  Ministerio di Turismo di Cuba. Formatur ta enfoca pa trece solucionnan den e sector turistico. Nan tin un curiculo amplio cu diferente materia enfocando riba cursonan di desaroyo y actualisacion. Tin programanan di servicio specialisa manera por ehempel tecnico pero tambe cursonan post grado cu diferente specialisacion unda despues por continua un estudio specifico profesional den e ramo di escohencia. Tin tambe cursonan di recapatisacion pa hendenan cu ta trahando caba den e ramo por tin e posibilidad pa haci un estudio di continuacion of manera un “refreshment course” y elabora riba lo cual nan a siña tambe.

E ta un scol di gobierno pa brinda e sosten den desaroyo laboral especialemtne den turismo pa casi tur e hotelnan di Havana, Cuba.

Pero, ademas,  pa cualkier specialisacion escohi tin den e curiculo tareanan basico manera ta, cultura, turismo en general, calidad, seguridad, etica y historia. Tur ta componentenan basico di un programa cu por sigui eynan. Pa admision na Formatur, mester pasa un examen y depende di e resultado, lo haya e formacion adecuado pa por eherce un profesion den turismo.

Despues di a ricibi presentacion di e directora di Formatur,  Sra. Elena Garcia Ramos Lopez, Minister Oduber a elabora riba e situacion y caracteristicanan di e sector turistico na Aruba. Sector Turistico ta e sector primordial pa nos isla. Na Aruba 90% di nos ingreso ta depende di turismo demostrando e importancia di esaki pa nos pais. E mandatario a comparti cu nos tambe tin educacion cu enfoke turistico, por ehempel na nivel universitario. Sin laga afo, EPB y EPI cu tambe tin nan estudio enfocando riba turismo. Banda di esaki tin “Aruba Certification Program” cu ta un programa pa esnan laborando den e sector turistico caba.

Lo cual a hala atencion di Sr. Oduber ta cu Formatur ta brinda e oportunidad na e hobennan di entre 16-17 aña cu kisas a termina nan estudio na EPI of EPB pero no ta cla pa integra den e sector laboral ainda. Un programa intermedio, cu ta brinda e hobennan un paso prome cu gradua profesionalmente den Turismo. Esaki ta tambe unda Minister Oduber a mira un posibilidad hopi claro di cooperacion entre Cuba y Aruba. Aruba na su turno por ofrece intercambio di informacion riba nos expertisio den e sector turistico mirando e nivel halto cu nos tin di servicio. Esanan presente a acorda y a mira esaki como un oportunidad.

Un otro topico interesante pa e Mandatario di Turismo, ta un di e elementonan di e curiculo di scol Formatur yama “rescate de la cocina cubana”. Esaki ta refleha e importancia di Cultura pa cu turismo. Tin diferente tipo di turista y awendia e turista ta busca un poco mas cu djis un lama pa disfruta di dje. Rescate di cuminda tipico, por ta un aspecto interesante. E directora di ATA, Sra. Ronella Tjin-Asjoe-Croes tambe a haya e punto aki uno interesante pa investiga.

Un bon bishita na scol Formatur cu un tremendo presentacion di e directora Sra. Elena Garcia Ramos Lopez. Minister Otmar Oduber a keda sumamente satisfecho cu e presentacion aki y na mes momento a comparti aspectonan di turismo di Aruba pa mira e oportunidadnan cu por tuma pa un cooperacion entre Cuba y Aruba. 

Expresionnan haci den e articulo aki no necesariamente ta refleha opinion di ArenaPoliti.co