Mas di 3 mil bishitante a yega na nos isla pa disfruta di un espectaculo unico 

Minister Otmar Oduber a keda sumamente contento y satisfecho cu e resultadonan di e prome Aruba Summer Music Festival, unda cu mas di 3 mil bihistante a yega nos isla pa disfruta di tres dia di espectaculonan unico.
Diahuebs, durante e prome anochi, nos bandanan local a sa di demostra e profesionalismo cu nan tin pa ofrece y a deleita esnan presente cu un reprertorio di nan miho cancionnan. Un pabien hopi grandi na D-Licious, N-Fuzion, Robert y su Solo Banda Show, Le Groove y Tsunami.
Diabierna na Harbor Arena mas di 5 mil persona a goza y balia cu artistanan intrenacional grandi manera ta Jerry Rivera, Elvis Crespo y Carlos Vives, mientras cu nos talento local Janiro Eisden a sa di pone e toke local durante e anochi. Cada artista na su manea a sa di pone ambiente na nan manera y un y tur a disfruta di un anochi increibel cu e toke di musica latino.
Diasabra anochi, e ultimo di e Aruba Summer Music Festival Harbor Arena no tabatin lugar pa pone mas hende y un cantidad grandi a keda pafo, mirando cu e concierto tabata sold out. Nicky Jam a habri e anochi lantando e ambiente y a wodo segui pa Janiro, A ta Niro cu un biaha mas a mustra e talento cu e tin. Nos propio Nutz Beatz a continua y a mustra e talento internacional di nos hendenan. E punto culminante di e anochi tabata den man di Mr 305 Pitbull cu a mustra un excelente show y tur hende presente a disfruta di dje te na ultimo momento.
Minister Oduber a indica cu e tipo di festival asina tabata e granito cu tabata falta den e varios festivalnan internacional cu nos isla ta ofrece anualmente. Mirando e resultado di e 3 dianan cu a pasa, unda cu por a wak cu mas di 3 mil bishitante a yega nos isla pa disfruta di esaki y mas di 20 periodosta internacional a cubri e festival, e Aruba Summer Music Festival a demostra su derecho di existencia.
Awor lo sigui e evaluacionnan necesario pa confirma esaki y duna cifranan mas specifico di e festival pa determina su continuacion.
E mandatario a probecha e ocasion pa gradici organizadornan y tambe e artistanan cu na un manera unico a haci un promocion grandi pa nos isla a traves di nan social media.

Expresionnan haci den e articulo aki no necesariamente ta refleha opinion di ArenaPoliti.co