Pasobra e por tin consecuencia grandi pa Aruba. 

Fraccion di AVP a tuma nota di e expresionnan haci na Venezuela door di e miembro di Parlamento di Aruba, sr. Glenbert Croes tocante di e conflicto teritorial entre Republica Bolivariana di Venezuela y Republica Cooperativo di Guayana. For di medionan di comunicacion Venezolano por conclui cu sr. Glenbert Croes lo a bisa di ta papia den nomber di gobierno di Aruba. E expresionnan ademas a wordo interpreta comosifuera e pais Aruba ta envolucra su mes den e conflicto entre e dos paisnan. Esakinan ta dos punto cu fraccion di AVP mester desaproba.

NO METE DEN ASUNTO DI OTRO
Fraccion di AVP a y semper lo mantene e posicion di no mete den asuntonan interno di otro paisnan. Cu su expresionnan sr. Glenbert Croes a mete den asunto di otro paisnan. Aruba no sa mete den asuntonan di otro paisnan. Aruba no kier pa otro mete den nos asunto tampoco. Aruba a y semper lo mantene bon relacion cu tur pais, basa riba respet mutuo y di acuerdo cu ley internacional. Sigur cu nos paisnan bisiña.

REINO HULANDES
Gobierno di Reino Hulandes ta esun responsabel pa e maneho y fihamento di posicion riba tur asunto di caracter internacional. Reino Hulandes tin un posicion neutral den e conflicto entre e dos paisnan aki. Fraccion di AVP ta subscribi e posicion neutral aki.

LIBERTAD DI EXPRESSION
Tur hende, tambe tur miembro di Parlamento tin libertad di expresion. Di miembronan di Parlamento sinembargo ta spera cu nan ta compronde cu ora nan papia como miembro di Parlamento, e expresionnan ta haya un peso hopi mas grandi. Sr. Glenbert Croes, cu tur su experiencia mester sa cu su expresionnan lo por wordo malinterpreta cu consecuencianan indesea pa Aruba. Ademas sr. Glenbert Croes y niun miembro di Parlamento tin e autoridad pa papia den nomber di gobierno di Aruba. Den asuntonan internacional niun miembro di Parlamento tin e autoridad pa papia den nomber di Reino tampoco, amenos cu e haya e autorisacion aki explicitamente for di Ministerio di Asuntonan Exterior di Hulanda. Sr. Glenbert Croes no a haya e autorisacion aki.

Conclusion: sr Glenbert Croes no por papia den nomber di Aruba ni di Reino Hulandes. Sr. Glenbert Croes por papia pa su mes como persona y como politico pa su partido MEP. Hasta e ora ey lo ta responsabel y corecto pa e tene cuenta cu consecuencianan di su expressionnan pa henter Aruba. E metemento den asuntonan interno di otro paisnan, tampoco ta acceptabel. Fraccion di AVP ta desaproba e expresionnan haci door di sr. Glenbert Croes pa e motibonan aki. Fraccion di AVP ta expresa respet pa e dos paisnan Venezuela y Guayana y ta desea pa e disputa entre nan wordo soluciona den un forma pasivo via dialogo directo of via di instancianan internacional (Nacionnan Uni / Corte di Husticia Internacional) cu a wordo crea pa asuntonan asina.

Expresionnan haci den e articulo aki no necesariamente ta refleha opinion di ArenaPoliti.co