Por a tuma nota cu nos Promer Minister sr. Mike Eman ta promoviendo Aruba den exterior como un pais di conocemento riba energia alternativo y sostenibel. Pero ora bo pone bon atencion na locual su persona ta haci ta mas bien manera defunto HelminWiels a yam’e: ‘Mike de makelaar’. Pasobra nos Promer Minister aki ta propaganda TNO y otro institituto Hulandes como referencia di conocemento den area di sostenibilidad y pa loke ta institutonan Arubano, net nada. Y mas tristo ta cu ora bo kier papia di bo pais como un pais di conocemento bo mester percura pa bo poblacion por tin aceso na estudio  p’asina nan por desaroya nan conocemento. Locual ta pasando ta cu nos tin di importa conocemento pa despues bende esaki den exterior como Aruba, pero mas bien Mike de makelaar ta haciendo negoshi pa Hulanda y Aruba lo keda e proefkonijn cu pata pata di debe pa realisa tur prueba sostenibel.

Educacion a bira un luho
Nos Promer Minister ta mas bien un profeta falso pasobra den su propio pais educacion no tin prioridad.  Den su propio pais su gobierno a reduci subsidio na fundacionnan cu consecuencia cu mester a subi contribucion di scol y aki mayornan mester a bringa nan derecho den corte pa un huez por a para esaki y unda cu huez a pone bon cla cu un gobierno no por trapa riba constitucion. Un MAVO-HAVO scol cu tin 6 aña para, mientras nos Minister di Infrastructura ta mustra claramente cu e no tin ningun prioridad pa construi e scol aki y cu e consecuencia pa cupo di scol ya por ser sinti caba na HAVO pero tambe na EPI. E mesun gobierno aki ta esun cu a declara cu nan lo percura pa reduci tarifanan di estudio, pero awor por wak cu bou di e gobernacion aki educacion a bira un luho y cu pronto e lo por bira cu esnan cu bon recurso so lo por sigui mas leu y mayoria di e poblacion mester conforma nan mes.  Nos isla den Caribe ta un di esnan  cu cifra mas halto den keda sinta y hopi di esakinan ta consecuencia di normanan di proefwerk disproporcional principalmente den scolnan basico y tambe interpretacion di normanan di cambio di klas.

Un pais di conocemento
Mas tristo ta cu ora bo ta papia di un pais di conocemento bo poblacion mester  percura pa yiunan di tera por studia mas leu cu ta posibel den nan pais  y crea  e posibilidad cu un grupo mas grandi ta bay studia afo y engrandece nan conocemento y trece esaki bek den nan pais unda tin  di percura pa nos mesun pais atrae nos muchanan bek (bahando nan debe di estudio y cu trabao na nan nivel di estudio) pa nan por duna nan conocemento na nos hendenan (actualmente 3% di nos poblacion tin un estudio universitario). E ora ey nos ta haci nos isla un pais di conocemento y  no manera cu e ta awo cu e  grupo di yiu di tera ta keda afor pasobra  no tin trabao mientras ta importa conocemento keto bay di exterior. Con bo por papia di un pais di conocemento si den bo propio pais bo tin un poblacion cu 69%  tin MAVO of menos cu esaki na estudio. Unda su plan ta pa seccion di adulto p’asina mas  hende cu pa un of otro motibo a dropout pa nan por tin aceso na estudio y p’asina nan por mehora nan calidad di bida (por cuminsa na baha e suma pa haci staatsexamen).
Ta bon promer cu nos Promer Minister bay afor y bende Aruba como pais di conocemento e percura pa den su pais pa enseñansa ta prioridad number uno. Y cu por hinca hopi mas placa pa mehora esaki riba termino mas corto sino nos lo haya nos cu un boom social grandi mes aki na Aruba. Pero ta bisto cu ta  su imagen irealistico cu su vision di Aruba 2020 completamente sostenibel e ta bende riba custia di cada pagado di belasting y cu te dia di awe ta pronkia cu pluma di otro riba tereno di energia alternativo.  

Expresionnan haci den e articulo aki no necesariamente ta refleha opinion di ArenaPoliti.co