Aruba a wordo sacudi siman pasa cu un tiroteo den area di high rise caminda un ciudadano a keda herida y mester a wordo translada pa Colombia pa por ricibi tratamento avansa. Fin di siman cu a pasa, Aruba a bolbe wordo azota pa un caso di tiroteo den area di high rise, caminda un grupo di hoben a los tiro den un multitud di hende dilanti un establecimento nocturno. Ta gracias na Dios mes cu e balanan no a alcansa ningun hende. Tambe Pueblo por a tuma nota cu den e mesun fin di siman aki tabata tin un biaha mas tiroteo den Village na San Nicolas. Tur e acontecimentonan aki tin e ciudadanonan di nos isla preocupa y ta puntra: “Unda nos dushi Aruba ta bayendo anto?” 

Fraccion di MEP ta sumamente preocupa pa e desaroyo negativo aki y ta lamenta mas ainda cu e Minister encarga no ta percura pa Mando Policial tin e recursonan necesario pa por, di un manera mas efectivo, combati criminalidad. Durante tratamento di presupuesto 2015 di pais Aruba, nos fraccion a trece padilanti nos preocupacion cu e mandatario di Husticia ta sigui permiti na corta riba presupuesto di su ministerio. Pueblo awo ta testigo di e consecuencia desastroso di su maneho.

Den pasado Aruba tabata conta cu Warda Nos Costa, Radar y Helicopter pa proteha nos frontera y percura pa minimalisa e cantidad di arma y droga cu tabata drenta nos Isla. Awendia por mira cu nos tin un Warda Nos Costa pero sin un maneho specifico. No tin radar mas y desde december 2013 Aruba no ta conta mas cu e servicio di helicopter pa contribui na cuida nos costanan. E dinamica den criminalidad di awendia ta exigi un control mucho mas severo y e combinacion di Kustwacht y Polis so, cu tur respet pa nan profesionalismo, no ta brinda Aruba e contesta necesario. 

Ta tristo pa mira cu e ciudadano Minister ta biba den su cocolishi y no ta convivi cu e Pueblo. E mandatario di Husticia a wordo eligi no solamente pa protege Aruba di malhechornan cu ta comete e tipo di barbaridadnan aki riba nos hendenan, pero tambe pa tur cu ta bishita nos pida baranca. Ta lamentabel pa mira cu e mandatario no tin e capacidad di convivi ni cu AHATA, corda e Pueblo cu ta den un preocupacion y no ta sinti cu Aruba riba tereno di siguridad, no ta mescos mas. Ni den nan mesun cas of den un luga asina transita manera high rise hotels ta sinti nan mes sigur mas. E mandatario ta keda sconde tras di estadisticanan bisando por ehempel: “Aruba compara cu otro islanan den Reino y Caribe, ta e luga di mas safe!”. Señor Minister, nos fraccion kier sa cu ki cara bo ta mira e personanan cu a caba di wordo atraca y bisa nan cu nan mester ta contento pasobra compara cu otro Pais den e region cos ta peor!

Aruba definitivamente merece mihor! Aruba no merece loke a pasa den e fin di siman aki. Arubanonan y tur nos bishitantenan mester sinti nan mes sigur y biba trankilo riba e Isla aki! Nan kier sigui sinti nan mes protegi na tur momento. Cu tur respet pa e ciudadano Minister, pero tanten cu e gobierno aki ta na mando, no tin ningun garantia pa siguridad paso pa nan siguridad no ta prioridad. Comunidad ta para ariba cu ta ora pa un cambio pa mihor!", Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co