Visibel den renobacion y construccionnan andando 

ORANJESTAD – Siman a inicia cu bishita di Minister Benny Sevinger den Caya Grandi. Hunto cu Minister President, el a anuncia e organisacion di un fin di siman di actividad en conexion cu aña escolar nobo, pero tambe e asignacion di Stanley de Marchena pa cu creacion di e Business Improvement District (BID).  E titular di Infrastructura a trece dilanti un aspecto masha faborabel pa loke ta henter e vision di renobacion di Oranjestad y esey ta e reaccion positivo di parti di comerciantenan. Varios negoshi y propietario di edificio den Caya Principal tambe ta wak e bentahanan di haci renobacion y hisa e balor di nan propiedad pa crea un espacio mas agradabel y atractivo pa clientenan.

Minister Sevinger a mustra riba e caya cu ta limpi, e matanan cu ta dorn’e y sigur e facilidadnan manera banki y tramnan cu ta coriendo constantemente. “Sin duda e proyecto a cuminsa haya forma,” el a expresa. Tambe a menciona con for di prome instante cu a cuminsa cu e proyecto, tabata un prioridad pa Gabinete Mike Eman, pa encurasha participacion mas activo di parti di comerciantenan. Hustamente esey ta un di e obhetivonan di BID.

Algun di e ehempelnan cu Minister di Infrastructura a menciona tabata tur esnan rond di dje e momento ey mes, manera Penha, Aruba Trading, Athlete’s Foot y Mango. Esaki ta un tendencia cu por sigui mira ora bo bay ariba. Edificio di Ecco ta den construccion y un di e dos tiendanan cu ta bin na su luga ta Bath & Body Works, mescos tin tienda nobo di Aldo y sin laga afo, henter e compleho di Nikki Habibe na final di caya. Otronan ta e construccion di tienda grandi di Zara y renobacion di La Linda di mucha.

“Bo ta mira cu e comerciantenan a tuma e reto aki na serio, ta invertiendo den nan propio tiendanan,” Minister Sevinger a comenta, añadiendo cu “Comerciantenan a tuma e reto y Gobierno ta pone infrastructura y mi no tin duda cu den e proximo aña of aña y mey nos lo tin e caya grandi cu nos a mira su futuro di dia nos a cuminsa cu e proyecto.”

Un aspecto importante, segun e mandatario, ta pa awo pueblo tambe duna su sosten. Diabierna y diasabra ta bay tin actividad en conexion cu Back To School caminda tiendanan ta bay pone nan miho ofertanan, ta bay tin diferente entretenimento y presentacionnan deportivo den Caya G.F. Betico Croes. Ta pidiendo tur comerciante pa keda habri te 9’or di anochi pa asina tur hende probecha y crea un ambiente agradabel. “E siman aki nos ta pidi ciudadanonan di Aruba pa bin haci nan compranan den caya grandi. Asina un y tur ta coopera cu otro pa nos isla bay dilanti.”

Expresionnan haci den e articulo aki no necesariamente ta refleha opinion di ArenaPoliti.co