Ki insolito y ki increibel por zona e mensahe cu Mike E. como prome minister di e pais aki tabata tin, awor cu ta conoci cu tin candidato serio pa habri e refineria di nobo!
Ta resulta awor cu e "pobrecito " prome-minister di pais Aruba tin un dilema, y no cualkier tipo di dilema, sino un dilema inmenso, esta di habri e refineria of scohe pa un desaroyo duradero pa San Nicolas.
Pa colmo Mike E. ta considera e dilema asina grandi cu incluso e mester core bay cerca su "amigo di semper" Hulanda pa busca conseho cerca e minister di Buitenlandse Zaken con pa soluciona esaki. E ta wordo acompaña nada mas y nada menos cu door di Mike de M.

Nos pregunta ta keda, kico realmente ta e dilema di Mike E.?
Pa cuminsa ta bon pa refresca memoria di nos pueblo cu durante e dos ultimo eleccionnan, Mike E. y AVP a uza e tematica di refineria pa por haya voto y logra gana eleccion na grandi.
Na 2009 Mike E. y su clan a fulmina atrosmente y incluso a sera cabes cu Valero, cu practicamente a duna un conseho di voto pa AVP, cu ta e gobierno di turno na e momento ey ta esun cu a sera e refineria. De facto nunca e refineria no a sera, pero mas bien nan a lague ta idle. E clausura real tabata na 2012, y atrobe na 2013 Mike E. y su grupo di Alibaba ta bay pueblo y priminti cu nan ta habri e refineria atrobe.

Mientras tanto den e "Settlement Agreement" di 2010 Mike E. a yega na un acuerdo cu Valero, cu si no logra reactivacion anto den tanto aña lo mester bin desmantelacion.
Eynan tambe a cuminsa cu partimento di e propiedad di Pueblo, cu ta e tereno di refineria.
E prome cu a haya su parti tabata e compania Valero cu ta keda cu e transhipment y tambe cu e handling di fuel pa WEB. Den e cuadro aki Mike de M. ta esun cu ya caba ta sali beneficia, pasobra ta su compania ta percura pa tene e fuel cayente pa por mande pa WEB. Por ta cu ta p’esey Valero a aumenta e prijs di e fuel pa WEB door di cu e compania di Mike de M. a aumenta su fee pa Valero?

Loke cu ta conoci tambe ta cu hopi hende rond di Mike E. y Mike de M. a haña tereno caba den e area di refineria pa por haci negoshi cu e terenonan aki. Y nos di UPP ta kere cu esaki ta un di e DILEMANAN PRINCIPAL di Mike E., esta e compromiso cu el a haci cu su friends and more. Y no lubida esnan cu tambe tin interes den e trabou di desmantelacion.

Un OTRO DILEMA PRINCIPAL ta e compromiso cu Otmar O. tin cu Bahia Hotel cu lo kier traha e hotel na Colony. Esaki ta ensera un problema grandi pa Mike E., ya cu e negoshi rond di hotel aki ta na interes di tanto Otmar O. como di Mike de M. kendenan cu ta esunnan cu a biaha bay Sto. Domingo pa negocia cu e doñonan.
E di TRES DILEMA PRINCIPAL cu Mike E. tin, ta su FAMA, cu e ta bezig ta creando riba e foro internacional. Mike E. kier laga tur hende kere cu Aruba ta riba e bon caminda pa na 2020 bira completamente independiente di energia fosil.
Pues Mike E. ta sinti cu su meta personal pa logra merito personal internacional ta coriendo peliger.
Nos por a ripara caba den e articulo di Caribisch Netwerk, unda e ta vocifera esey claramente, cu re-apertura di e refineria lo ta bay contra di su maneho “green”.
E lo kier un futuro sostenibel pa San Nicolas.
Y den mesun rosea e ta bisa cu si mester yega na un decision pa loke ta e reapertura aki, esaki lo ta mara na condicionnan ambiental. Cu otro palabra esaki por bay ta un obstaculo pa cualkier posibel reapertura.

Claramente nos por mira aki cu tanto na 2009 como na 2013 Mike E. a engaña tanto e pueblo di San Nicolas como e pueblo di Aruba completo cu su promesa falso cu AVP sí lo percura pa e refineria ta habri.
UPP a vocifera na varios ocasion cu UPP ta pro un desaroyo nobo pa San Nicolas. Y den e caso cu e refineria no ta viabel mas, nos lo opta pa un desaroyo nobo na e sitio di refineria.
Pero nos a bisa tambe recientemente - mirando cu gobierno no a haci nada pa ningun otro desaroyo economico positivo pa San Nicolas y cu e situacion cu gobierno a maniobra e pais aki aden pa loke ta su debena - cu na e momentonan aki, mirando e cambio mundial cu e prijs di petroli a trece cu ne, ta esencial pa laga e oportunidad di un re-apertura como un posibilidad.
Lo e por tin influencia pa yuda mitiga e efectonan di e debenan astronomico cu gobierno ta hinca nos pueblo aden.

Pero e DILEMA di Mike E. ta muestra cu no tin e boluntad tampoco pa ta pro-pueblo. Particularmente su fama “green” ta importante p’e.
No obstante cu nos a mustra cu den e empeño di Carbon War Room, mas bien nan ta trata nos como “proefkonijn” y cu 2020 ta mustra di no ta alcansabel, toch ta sigui den e rumbo aki y no ta bin bek na e realidad actual.
UPP a yega di bisa caba cu nos ta pro pa bini cu solucion y maneho duradero y sostenibel, pero cu ya ta probá caba (“proven”).
Algun dia atras por a scucha Mark Oduber di Meteo den un entrevista na radio ta papia riba e efectonan di “climate change” pa islanan chikito den Caribe. E a bisa cu medidanan cu nos tuma aki na Aruba pa evita e “climate change”, tin efectonan minimo, ya cu e actornan principal den e sushamento di nos mundo, ta hustamente e paisnan y productornan grandi den mundo.
E ora nos ta puntra pakico gasta tanto placa den e asuntonan aki, mientras bo ta pone bo pueblo pasa miseria. Ki futuro sostenibel bo ta dunando bo pueblo?

Un biaha mas, banda di ta bay uza e condicionnan pisa pa e reapertura di e refineria riba tereno ambiental, awor ta parce cu mester reuni cu minister di Relacionnan Exterior, pa yuda Mike E. sali for di su DILEMA.
Lo bay uza tambe e aspecto di instabilidad politico na Venezuela pa hustamente no bin cu reapertura?
Y algun tempo atras ainda Mike E. kier hunga e rol di estadista importante den Caribe , ora di pretende cu nos mester tuma refugiadonan economico di Venezuela cu man habri, ya cu nan tambe ta buscando nan porvenir.
Y awor diripiente mester scucha Hulanda.
Mester wak Aruba su rol mundial. Cua rol?
Esun atrobe di “green”?
Dicon ora cu a bay na horca pueblo cu debenan astronomico manera di Hospital, Green Corridor, Ringweg III, no a bay papia cu Hulanda pa wak kico nan ta pensa? Di berdad e populista y neo-liberalnan aki no ta stima e pueblo aki, pero ta pensa unicamente den nan saco y nan fama. Te ki dia?

ARUBA Y ARUBIANONAN, QUO VADIS?



Den nomber di Union Patriotico Progresista – U.P.P.
Candelario A. S. D. Wever
Brazil, augustus 16, 2015

Expresionnan haci den e articulo aki no necesariamente ta refleha opinion di ArenaPoliti.co