EVELYN WEVER-CROES TA DENUNCIA PRESIDENTE DI PARLAMENTO 

ORANJESTAD – Lider di MEP Evelyn Wever-Croes diahuebs anochi via Facebook a denuncia cu su bida y bida di e parlamentarionan di MEP a wordo poni na peliger deliberadamente pa presidente di parlamento Marisol Lopez-Tromp.
Pa prome, presidente di parlamento no a informa parlamentarionan di ningun plan di seguridad, el’a percura pa su propio seguridad so, y no di demas miembronan. Riba dje e ministernan tabata tin cantidad di nan ‘security’ ta cana rond arma den e gangnan di parlamento. Especialmente Otmar Oduber tabata tin hopi hende stranjo ta cana rond, strobando parlamentarionan di MEP pa yega nan destino.
Pa colmo e cantidad grandi di fotografo y camarografo di e ministernan a trese hopi iritiacion pasobra nan tabata blokea e unico porta di salida pa e parlamentarionan di MEP, pa asina nan por graba Mike Eman di tur angulo. Esaki ta un violacion di tur regla di seguridad.

“Durante e reunion mi a hala atencion di presidente di Parlamento sigur 10 biaha riba e situacion aki, y mi a bis’e cu si e hendenan ey ta keda den nos oficinanan di Parlamento, ami tambe mester busca mi seguridad. Pero e presidente di parlamento a prohibi mi busca mi propio seguridad.
Den transcurso di merdia pa atardi e gang banda pabou a yena cu como 20 persona cu tabata tira palabra pa nos cu nan tin arma. E presidente di parlamento a nenga pa saca nan afo. Mas anochi a resulta cu otro minister a laga su hendenan drenta den e gang banda pariba, y a sconde den e cushina. Nos tabata memey di e dos gruponan aki di hende cu nos no sa ken nan ta, cu tin instruccion pa elimina oposicion, y cu ta arma.
Si cos lo a sali for di man, y si hendenan lo a drenta Parlamento, e promenan cu a core peliger ta nos, parlamentarionan di MEP, pasobra di banda pariba y di banda pabou nos tabata rondona pa hendenan di AVP cu tin un rabia enorme riba nos di MEP, y cu instrucción pa elimina oposicion.
Na final di e reunion presidente di parlamento y tur e ministernan y parlamentarionan di AVP a bandona e edificio, y ningun hende a avisa nos cu tabata den fractiekamer, deliberando nos siguiente paso. Nos bida a wordo poni na peliger, deliberadamente.
Presidente di Parlamento a faya den brinda nos di fraccion di MEP seguridad. Ela nenga nos pa regla nos propio seguridad, y na final di e reunion el’a laga nos sera den nos fractiekamer sin cu un hende por a bin avisa nos cu cosnan a sali for di man pafo.
Nos no ta laga esaki akinan. Ami lo entrega keho na Ministerio Publico pa deliberadamente pone mi bida na peliger. E denuncia aki nos lo canalisa tambe atraves di canalnan internacional, pasobra bo no por hunga cu bida di hende di e forma aki, y kere cu bo no mester paga pa e consequencia”, Evelyn Wever-Croes a declara.

Expresionnan haci den e articulo aki no necesariamente ta refleha opinion di ArenaPoliti.co