Mike E. ta conoci di ta un mentiroso patologico cu a logra di convence 33 mil votador pa deposita nan confiansa riba su partido a base di puro mentira, manipulacion di opinion publico cu cifranan ficticio (segun Cft, RvA, IMF) y yudá pa un campaña miyonario na unda a priminti e pueblo entre otro di lo kita e BBO totalmente y despues di lo sigui cu su “bon trabou y ainda falta”.

Mike E. a logra di gaña e pueblo votador, pero no e gobierno ni miembronan di e Tweede Kamer di Hulanda. Ya caba desde 2011 e ministernan hulandes encarga cu Aruba a haci mencion di palabracionnan haci cu Mike E. pa mehora e situacion financiero delicado di pais Aruba. Permitimi duna un recapitulacion di e acuerdonan cu Mike E. a firma cu Hulanda:

1. 15 di juli 2011: minister Donner ta expone e vision di e gobierno Hulandes pa cu e Islanan den Caribe y ta alerta Mike E. cu Aruba mester bay adapta un cambio den maneho: “Zoals gesteld, zijn een duurzame politiek en bestuurlijke wil en bereidheid om te voldoen aan de randvoorwaarden, basisvereisten voor een vruchtbare samenwerking. Bestendige overheidsfinanciën, een stabiele economie en rechtszekerheid zijn daarvoor bij uitstek van belang. Aansluiting van Aruba (op onderdelen) en het verder ontwikkelen en daadwerkelijk tot uitvoering brengen van deze wetten, zijn op de korte termijn cruciaal om tot samenwerking te komen.

2. 26 september 2011: a presenta oficialmente e “WODC-rapport” riba peticion di Mike E. A ser puntra pa evalua “de staat van bestuur van Aruba, een onderzoek naar de deugdelijkheid van bestuur en rechtshand-having”.

3. 27 di october 2011: Mike E. a firma un “Samenwerkingsprotocol” cu Hulanda pa por a fia placa riba mercado internacional. Mike E. a laga registra cu gobierno lo presenta un “meerjarig financieel kader 2010-2016” na Parlamento di Aruba.

4. 29 di october 2012: minister Spies ta declara den Tweede Kamer cu a palabra medidanan fuerte cu Aruba lo mester bay tuma.

5. 28 di maart 2013: a firma e famoso “Witte donderdag akkoord” na unda a palabra cu lo permiti investigacion di e situacion financiero door di IMF, Fitch y S&P, y lo tene debido cuenta cu control door di RvA, CBA y ARA.

6. E historia desde januari 2014 ta conoci y a culmina den firmamento di e protocol di 3 di Juli 2014 door di Mike E. na unda oficialmente a haci entrega di nos autonomia financiero.
Mike E., “de braafste jongen van de klas”, a kere, den su vanidad y arogancia, cu e tawata tin Hulanda den su saco y cu no tawata necesario pa cumpli cu palabracionnan haci cu e gobierno hulandes y cu e lo por a sigui su maneho financiero desastroso na Aruba.
Aki ta na unda ela comete e eror mas grandi di su bida, pasobra enbes di tuma un postura responsabel den interes general di nos pueblo, Mike E. a prefera di start un guera infantil contra Hulanda y contra nos gobernador.

Pero ora cu e pueblo Arubiano a kere cu e y su partido lo a siña nan les, despues di e intervencion hulandes cu otorgamento di un KB y investigacion door di e secretariado di Cft, e berdad a resulta completamente otro. Mike E. a ignora tur tipo di debate riba e resultado di e investigacion door di Cft desde e prome analysis na juli 2014, y a cuminsa un strategia na prome lugar door di no bisa nada (spreken is zilver, maar zwijgen is goud), desvia atencion cu atakenan personal contra miembronan di oposicion y principalmente cuestiona e legitimidad di e KB.

Dialuna 10 di november 2014 Mike E. a haña oportuno pa dirigi su mes na e pueblo Arubiano, na unda a presenta e supuesto presupuesto supletorio (?) y a delinea parti di su maneho financiero/economico. No a haci mencion ni un momento di e conclusion di e rapport di e secretariado di Cft, ni tampoco riba e conseho ainda mas devastador di RvA.
Esunnan cu a sigui su conferencia di prensa, a waak un prome minister “energetico” cu un "powerpoint- presentation", na unda a repasa atrobe e historia financiero di pais Aruba y e pasonan cu su gobierno a tuma y ta planifica pa eherce den e proximo añanan.
Remarcabel ta e cambio di lema desde e ultimo eleccion na 2013: di “bon trabou y ainda falta” pa “eerst groeien dan pas snoeien”.

Mike E. a declara den su rueda di prensa cu:
1. E deficit financiero ta 4.7% manera presupuesta na 2014, y cu e cifra di 9.3% publica door di Cft, tin di haber cu e suma di 170 miyon pa APFA. Aki atrobe Mike E. ta manipula cu cifranan. Mike E. ta lubida di splica cu ex-minister Yrausquin deliberadamente a manipula cu cifranan ficticio den e presupuesto 2014 y a exclui cierto sumanan, of a simpelmente hincanan den “stelposten”, manera indica door di RvA na mei 2014.

2. A papia di entradanan adicional e.o. destina pa AZV. Atrobe Mike E. ta lubida di splica cu RvA y Cft a duna un conseho negativo pa cu implementacion di e “healthtax”, argumentando cu e healthtax no mester wordo considera como un “besparing”. RvA corectamente ta basa su conseho negativo riba e “balanced budget akkoord di november 2013 ”.

3. Mike E. ta haci mencion di lo cumpli cu e palabracionnan haci den e balanced budget cu lo percura pa un crecemento di 3% pa 3.7%, a base di modificacion di e gastonan di gobierno y reformanan fiscal. Cft a prik esaki door masha liher mes den nan prome analysis di e presupuesto, ya cu nan por a constata cu gobierno ATROBE no a cumpli cu e compromiso pa mantene su palabra di reduci su gastonan. Y nos tur sa cu e derochamento di placa ta sigui na grandi.

4. Mike E. a considera mas importante pa dedica atencion na e calidad di bida y no ta ciega pa cifra of maneho di austeridad. Pero ta dicon anto a firma tur e protocolnan cu Hulanda na unda cu gobierno hulandes a exigi di Aruba medidanan di austeridad. Mike E. tawata bon na altura cu sr. Rutte ta sali for di e punto di bista di “eerst snoeien en dan pas groeien”, contrario na loke Mike E. a bin ta ehecuta na Aruba. Mike E. tawata alerta di hopi tempo caba cu Hulanda lo no acepta sin mas su falta di palabra pa ehecuta un plan de rescate responsabel.

5. Un di e formanan pa reduci e gastonan di gobierno segun Mike E., ta pa converti cierto departamento di gobierno den N.V. Aki ta papia di independisa parti di directie Luchtvaart, privatisacion di Landslab (pa duna un financista di nan campaña), incorporacion di postkantoor y departamento di Automatisacion y Informacion bou di SETAR.
Nos sa cu RvA a baha pisa ATROBE riba e plan pa splits directie Luchtvaart.
Landslab ta un departamento cu lo genera entrada si e wordo maneha di un forma responsabel, y e incorporacion di e dos otro departamentonan bou di SETAR ta ponemi corda e plan di rescate di Interbank na unda pueblo a sali perhudica pagando e.o. e debenan di e rumannan Eman.
Ta parce tambe di ta usa SETAR como e bari di sushi di gobierno, lubidando cu e empresa aki mester hiba un maneho responsabel.

6. Na final Mike E. atrobe ta subi su cabay di campaña indicando cu su gobierno a inverti en grandi den infrastructura di acuerdo cu e idea di sr. Paul Krugman, un economista cu a gana e premio Nobel.
Mike E. ATROBE ta trata di bende pueblo un 6 pa un 9, pasobra manera e rapport di Cft claramente a indica cu su gobierno a inverti menos di 1% di nos GDP pa stimula nos economia. Nos por a hasta constata a base di cifranan di CBA cu e gobierno anterior a inverti den 4 aña mas cu loke su gobierno a haci e prome 4 aña di su gobernacion.

Pa conclui UPP ATROBE mester constata cu Mike E. no a siña su les y ta keda consecuente den su strategia pa keda gaña e pueblo di Aruba cu ATROBE promesanan, trocemente di cifranan na su gran antoho y e mentiranan mayor: kita BBO por completo y cu NO lo implementa medidanan.

Di “bon trabou y ainda falta”, Mike E. diripiente kier laga nos sa cu su lema semper tawata “eerst groeien, dan pas snoeien”. Ta nos pueblo a compronde su mensahe durante eleccion malo.
ATROBE Mike E. ni su partido sa kiko ta nifica cumpli cu palabracion, y p’esey UPP kier alerta nos pueblo pa no confia e palabranan di un gobierno y prome minister cu lo pasa den historia como entreguista y mentiroso.
E gobierno actual cu a causa e desaster financiero no por ta parti di e solucion y rescate di nos Pais. Y nos no mag di lubida cu " TA E PUEBLO SO POR SALBA E PUEBLO!”

Den nomber di Union Patriotico Progresista – U.P.P.
Candelario – Booshi – Wever
Brazil, november 11, 2014

Expresionnan haci den e articulo aki no necesariamente ta refleha opinion di ArenaPoliti.co