Panelnan Solar na Scol Kudawecha lo produci 175.5 kilowatt uur di coriente 

ORANJESTAD – Sr. John Reyes y su empresa Retraco ta un partner importante di WEB Aruba NV den implementacion di vision di pais Aruba pa logra ta 100% liber di uzo di petroleo den produccion di coriente. Den cuadro di esaki, WEB, ta instalando panelnan solar riba dak di scolnan y edificionan di publico. Siman pasa a cuminsa na ehecuta e plan aki riba e prome scol, Scol Basico Kudawecha.

WEB NV kier logra un produccion di 1.5 Megawatt di coriente for di e panelnan solar riba e edificionan aki y pa ehecuta e proyecto ta haci uzo di e servicionan di sr. Reyes y su empresa Retraco, cu tin experiencia amplio riba e tereno aki.

Segun Reyes a splica, su experencia cu panelnan solar a cuminsa den su bida priva prome cu el a haci di esaki su negoshi. Aruba ta un pais cu tin hopi solo y siguiendo e avancenan na mundo, el a dicidi di concentra su mes riba e tecnologia aki, cu ta yuda baha e gastonan di coriente.

A haci calculacionnan y na Scol Kudawecha ta instala 185 panel di 300 watt cada uno cu lo produci 175.5 kilowatt uur en total. Pa duna un ehempel di loke e produccion aki ta, Reyes a splica cu e 175.5 kilowatt lo por suministra entre 30 pa 35 cas cu coriente a base diario. E produccion di e panelnan aki ta fluctua dependiendo di e cantidad di nubia cu tin. “Ora tin hopi biento nubianan ta pasa bay lihe y ta yuda den e produccion,” Reyes a splica.

E produccion di e panelnan solar ta bay riba grid di ELMAR cu ta distribui esaki pa su clientenan. WEB tin un proyecto di “Fly wheel” cu ta un sistema unda ta warda e coriente. Na momento cu tin un “overproduction” di energia renobabel, ta ward’e pa sak’e ora tin mas demanda. Tur e tecnologianan aki ta yuda evita cu fluctiacion di prijsnan mundial di petroleo ta afecta nos pais cada bes menos y a largo por baha e tarifanan di awa y coriente, manera cu ta deseo di gobierno di Aruba.

Expresionnan haci den e articulo aki no necesariamente ta refleha opinion di ArenaPoliti.co