Minister di Economia, Comunicacion, Energia y Medio Ambiente ing. Mike de Meza 

ORANJESTAD – “Momentonan masha dificil,” ta e palabranan cu Minister di Economia, Comunicacion, Energia y Medio Ambiente, ing. Mike de Meza, a scoge pa describi e tempo cu a cuminsa cu trabounan pa drecha e situacion na Aruba na 2009. Sr. De Meza tabata papiando riba e topico di desaroyo economico di Pais Aruba y con a logra yega na e nivel cu awe Aruba tin un crecemento economico unico den Reino y nos region.

E herencia cu Gabinete Mike Eman I a haya di Gabinete Oduber IV tabata uno sumamente malo. Banda di e crisis mundial, refineria a stop su operacionnan na Aruba, loke a causa un caida di 15% di economia di Aruba. Banda di tur esey, turismo tabata bayendo malo. Y e motibo tabata uno hopi serio segun ing. De Meza. E relacion entre e gobierno di e tempo ey y entre otro Valero tabata masha malo mes. E relacion malo a ki a causa cu Partnernan Strategico di Aruba den turismo tabata lagando Aruba un pa un; entre otro KLM, American Airlines y Carnival Cruise Lines, na desbentaha di nos turismo.

Desempleo tabata sumamente halto, poder di compra a cay dramaticamente y consistentemente pa 8 aña, tabata tin un situacion caminda cu no a duna indexering pa 8 aña largo, infrastructura y scolnan di nos pais tabata den un situacion deplorabel. “Enfin, e retonan tabata inmensamente grandi,” e Minister encarga cu Economia di Aruba a enfatisa. Banda di tur esaki, e situacion cu AZV, SVb y APFA tabata for di control. “Si Gabinete Mike Eman I, no a haci nada pa 2013, e reservanan lo a caba, mester a haci hopi cambio,” segun ing. De Meza relaciona cu fondonan di SVb.

“APFA, e tempo ey tabata tin un ‘dekkingsgraad’ rond di 72%.” Sr. De Meza a splica, y debi na e ‘dekkingsgraad’ sumamente abou aki, cada bes e ambtenaarnan cu tabata maneha e fondo tabata alarma y splica cu si no haci nada e primanan lo a pasa 100%. “Tur esaki ta dunabo un indicacion den ki estado nos a haya e gobierno e tempo ey, despues cu e gobiernonan prome, Gabinetenan Oduber III y IV, no kier a tuma decision pa por a drecha e situacionnan aki pa añanan largo y a laga tur esakinan bay for di man.”

Segun sr. De Meza, ta un ironico cu esnan di partido di Gabinetenan Oduber cu awe ta den un Aruba cu un situacion economico mucho mas comfortabel, door di trabou y decisionnan dificil y importante cu Gabinetenan Mike Eman si a tuma y awe kier discuti kico ta bon gobernacion of no. “Bon gobernacion,” Sr. De Meza ta enfatisa, “ta na momento cu abo ta den gobierno, cu bo mester haci e trabou manera debe ser!” Ing. Mike de Meza a sigui reitera cu, “mester a percura pa drecha e situacion ora tabata necesario y no laga e Pais aki den un desaster total, bisando cu bo ta ‘laga e caha di gobierno bashi p’e otro gobierno cu ta bin.’”

Minister de Meza, a sigui splica cu e trabounan di Gabinete Mike Eman e tempo ey a enfoka pa drecha e poder di compra di esnan mas vulnerabel y di menos entrada y na e mesun tempo inverti den drecha Aruba su infrastructura decayente, scolnan den mal estado y asina traha riba drecha e bida socio-economico na Aruba. “A haci hopi inversion tambe den barionan, den centronan di ciudad di San Nicolas  y Oranjestad y ainda ta trahando riba proyectonan sumamente grandi y importante pa pueblo henter, manera Green Corridor, expansion y renobacion di dr. Horacio Oduber Hospital y tambe e Waf di Container nobo na Barcadera.”

A inverti hopi tambe den companianan estatal, Sr. De Meza, a splica, ”WEB, ELMAR, Setar, APA, AAA, nos ta papiando di hopi inversionnan cu a tuma luga den e companianan aki, bou di Gabinetenan Mike Eman I y II, y awe y nos ta contento pa wak e cifranan te awor aki cu ta mustra con e economia a ‘rebound’”. Pa e aña aki calculacionnan di departamentonan di gobierno, conhuntamente cu Banco Central ta mustra, cu ta bay tin un crecemento di BBP di 5%.

Expresionnan haci den e articulo aki no necesariamente ta refleha opinion di ArenaPoliti.co