Prensa di Aruba a publica dia 5 di november ultimo un articulo sumamente denigrante y mahos di Jim Hepple, presidente y CEO di Aruba Hotel and Tourism Association (AHATA), den cua e homber aki ta hinca den su cabez loco pa ofende nos, Arubianonan, enormemente, y pa medio di e articulo aki nos ta protesta energicamente contra e remarcanan denigrante cu Hepple ta haci riba nos Arubianonan!

E articulo di Hepple ta trata e eliminacion di contractnan fiho di labor pa tempo indefini (“vaste arbeidscontracten voor onbepaalde tijd”), y e posibilidad pa - te 3 biaha - sera contratonan di labor pa 8 luna, di manera cu e empleadonan lo por drenta den “vaste dienst” di un empresa nomas despues di 2 aña (3 x 8 luna=24 luna, pues dos aña).

Cu esaki Hepple kier hiba nos back den e tempo di esclavitud, den cua doñonan di empresanan tabatin nan empleadonan “on call”, tabata manda e empleadonan cas ora e trabao tabata un poco menos, tabata practica un sistema “free-lance”, y un cantidad di otro practicanan, cu no tabata permiti nunca pa e empleadonan por a drenta den “vaste dienst”, y tampoco nunca por tabata sigur di un entrada fiho.
Consecuencia di esaki tabata cu e empleado nunca por a haya un prestamo cerca un banco pa por traha un cas, pa motibo cu no tabatin siguranza cu e lo por a keda cumpli cu e obligacion financiero pa cu e banco.

Hepple ta alega awor cu E mes henter su bida largo semper a traha pa un tempo defini, of durante un cantidad di aña defini, y cu esaki ta masha normal mes na Europa y na Merca; e homber ey ta gaña!!
E gobierno di MEP e tempo aya a percura cu, despues di a cumpli cu e tempo di prueba (“proeftijd”) di 2 luna, empleadonan por a drenta den “vaste dienst”, cu algun excepcion sinembargo, por ehempel pa empleadonan cu tabatin un tarea of encargo especifico cu tabata mará na un cierto periodo, of pa personanan cu tabata re-emplaza empleadonan den “vaste dienst” temporalmente, y den e caso di e asina yama “Swiss-model” pa stranheronan cu despues di 3 aña mester a regresa nan pais di origen atrobe.

Awor Hepple ta bini cu un cantidad di pretextonan (“smoesjes”) tocante hobennan cu no sa si di berdad nan lo kier traha pa tempo largo den servicio di un empresa of un hotel, y cu - segun Hepple - lo ta irazonabel si empleadonan – fuera di un bon salario y bon condicionnan secundario di trabao – riba esey ainda bin exigi siguranza.
Ta ampliamente conoci cu Hepple no ta den servicio di AHATA unicamente, pero mas tanto den servicio di Eduardo de Veer, e homber cu ta haya tur cos di regalo di Mike Eman y su gang di minister: tuberianan di gas y gas gratis, y awor aki ademas e ta haya Arubus regalo, di manera cu e tarifanan pa e poblacion trahador pober ta bay wordo aumenta ainda hopi mas, mientras cu Eduardo de Veer no kier empleadonan den vaste dienst mas.
Eduardo kier e sistema Colombiano: djis duna e empleado contratonan nobo cada 4, 6 of 8 luna, e ora ey nan ta keda cu miedo di perde nan trabao, y pues nan no ta join sindicato tampoco.
Ta e mes un De Veer aki kende secretamente, hunto cu Harms, dia 3 di november ultimo tabatin un reunion scondi, cuchi-cuchi, cu minister Plasterk, mientras cu di otro banda Plasterk no tabatin tempo si pa reuni cu MEP, siendo e partido mas grandi den oposicion!
Y ta di e manera aki nos pais ta wordo horca y strangula te na morto door di AVP, De Veer, Hepple y, sí: e propio “madre patria” Hulanda.

E insulto pa e Arubianonan
Pa colmo, despues di tur su gañamento, Hepple ta ofende e comunidad Arubiano door di acusa e Arubianonan cu nan no kier traha den hotel.
Di acuerdo cu Hepple, e Arubiano lo no tin gana di traha den finnan di siman, ni den solo. Solamente trabao di oficina di 8 pa 4 nos, Arubianonan, lo kier.
Ta bon pa nos corda Jim Hepple, cu turismo di Aruba por a crece y bira grandi danki na e pueblo di Aruba y e reputacion excelente di amabilidad y cortesia di e Arubiano!
Tabata ya desde e prome hotel grandi, esta Aruba Caribbean Hotel, cu Aruba a haya renombre pa nos amabilidad. Ya pa mas di 50 aña Aruba ta conoci  pa e amabilidad di su pueblo, y ta e Pueblo Arubano a haci cu turismo a crece y bira asina grandi!
Un advertencia ta bay pa Hepple pa e no sigui ofende nos Arubianonan!
Tabata te despues di aña 2009 - tempo cu e gobierno di AVP a elimina y a deshaci di e radar, e helicopternan y Guarda nos Costa, y a habri nos fronteranan pa miles di stranhero – cu e servicio riba Aruba a cay y a deteriora asina rapidamente, cu awe, aña 2015, turismo ta na werki, y cu ocupacion na hotel ta sigui baha tur luna.
Ta e propio hotelnan, e mesun Jim Hepple y e mesun Eduardo de Veer cu ta prefera di tuma stranheronan den servicio por medio di agencianan, di manera cu ta sali nan mas barata, pasobra di e manera ey nan ta paga salarionan cu ta mas abao cu e “minimumloon”, fomentando asina ey e “cheap labor”.
Salarionan abao, lubida riba “fringe benefits”, y no tuma hende den “vaste dienst” pero tene nan “on call”, esey ta locual De Veer, Hepple, AHATA, ATIA, gobierno di AVP y otro abusadornan kier.
Y ta asina ey nan a kibra y mata nos turismo.
Pueblo di Aruba mester realisa su mes hopi bon e manera malicioso y maligno di e instancianan mencioná aki’riba!

SALBA ARUBA                     VAKBOND SCCA                 ARUBIANONAN PREOCUPA


Lucio Thijzen,                        Jose Giron,                          Mariano van der Linde,   
presidente                             presidente                            presidente
T: 592-0760                          T: 594-8618                         T: 592-1198

Expresionnan haci den e articulo aki no necesariamente ta refleha opinion di ArenaPoliti.co