Minister Eman a entrega nos autonomia financiero a cambio di un saco di placa. 

E cambionan necesario pa e presupuesto pa 2014 pa nos Pais a wordo entrega na Parlamento y algo cu sigur a resalta for di e splicacion cu ta compania e ley, ta e hecho cu Aruba ta haya supervicion financiero permamente di CFT. Di e manera aki a keda confirma cu Minister Eman cu su mal maneho financiero a percura pa entrega nos autonomia financiero a cambio di un saco di placa. 

Ya for di 2011 na momento cu Minister Eman a firma e Protocol di Cooperacion cu Minister Donner di Hulanda, tabata bisto cu nos Promer Minister a firma pa asina entrega nos autonomia financiero a cambio di un saco di placa pa por keda goberna pa semper. Na 2013 Minister Eman a firma e Acuerdo di Diahuebs Santo cual ta un ehecucion di e Protocol di Cooperacion y den esaki e mandatario aki a concretisa locual awe ta bira e supervicion financiero door di CFT. Di su parti Minister Eman a percura pa su gobierno haci deshaci cu placa di Pueblo te na e extremo cu nos a haya un KB den cual e investigacion di CFT a bira realidad, y awe como pleister riba e herida ta bay cambia nos Staatsregeling pa introduci un Fiscal Council cu lo tin CFT como consehero principal. 

Pues di e manera aki Minister Eman a logra pa Aruba bay bou supervicion financiero di CFT sin cu mester tabtata tin un Ley di Reino de por medio manera ta e caso na Corsow y Sint Maarten. No lubida cu Corsow y Sint Maarten a haya nan Status Aparte y a recibi ayudo financiero di Hulanda cu e condicion cu nan lo ta someti na supericion financiero di CFT. Awe nos ta mira cu Aruba danki na Minister Eman ta wordo someti na supervicion financiero sin sikiera a haya yudansa financiero, pero puramente pa evita cu e mal gobernacion di Gabinete Eman por caba di kibra e Pais aki financieramente. 

Pesey ta tristo pa mira con enves cu Minister Eman a asumi su responsabilidad pa goberna nos Pais na drechi, awe ta core schuif su responsabilidad, tira culpa riba otro y entrega nos autonomia financiero djies pa por haya un saco di placa pa e por keda goberna pa semper. Cu e supervicion financiero di CFT ta bira permanente, ta confirma tambe cu e welga di hamber di Minister Eman tabata nada mas cu un simpel show pa gania Pueblo cu e ta lucha pa mantene nos autonomia financiero.

16 november 2014

Expresionnan haci den e articulo aki no necesariamente ta refleha opinion di ArenaPoliti.co