Oranjestad: Durante rueda di prensa semanal di Partido MEP, Parlamentario Sr. Guillfred Besaril, a elabora riba e situacion di insiguridad reinante den nos comunidad. Parlamentario Besaril declara lo siguiente:

"Atrobe Aruba a cera un fin di siman cu un cantidad di ladronicia arma. Simplemente dor di pasa riba e paginanan di noticia riba internet, ya por nota caba cu nos pais no ta esun di antes mas. E falta di maneho den husticia a haci cu tin un free for all awendia y criminalnan tin frontera liber pa trece tur tipo di arma pa comete nan fechorianan.

E pregunta clave den tur esaki ta: “Ki dia minister Dowers ta cuminsa pone atencion riba prevencion di criminalidad?” Ya pa basta tempo fraccion di MEP ta boga pa pone mas polis riba caminda. Pueblo ta haya falta di mira polis ta patruya de bario. Esaki no solamente lo contribui na e prevencion di criminalidad, pero tambe na e sintimento di siguridad di e ciudadano. Banda di introduccion di mas polis, Fraccion di MEP ta haya cu ta necesario pa duna un contenido real na e departamento di Warda Nos Costa pa asina nan por controla nos frontera. Ta un realidad tristo cu awendia nos frontera ta manera un sefta y tur tipo di arma y otro articulonan ilegal ta drenta nos pais. Si duna Warda Nos Costa e autoridad necesario esaki lo yuda sigura nos frontera y lo evita cu entre otro arma y otro articulo ilegal por drenta nos pais.

Lamentablemente Aruba ta cera un otro weekend caminda locual ta resalta den noticia ta un serie di ladronicia y atraco, mayoria di nan cu arma di candela. Casonan di malhechornan fuertemente arma cu ta drenta cas di ciudadanonan indefenso maltratando nan y lagando nan atras cu un no solamente e daño material sino tambe un daño emocional y un sintimento di no ta safe ni den nan mes un cas. Ta bira ora pa e gobierno aki cuminsa tuma husticia y siguridad di nos pueblo na pecho, y si nan no por, nan baha pa caba pasobra tin otro cu si tin Aruba na pecho y si kier traha pa hiba nos pida baranca padilanti. Comunidad di Aruba tambe kier pa Solo briya pa Nan!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co