Empleadonan di Monumenten Bureau a haci un invitacion special na Minister Oduber pa pasa y combersa un rato. E mandatario dunando balor na e departamento importante aki a sinta combersa cu cada empleado. Durante e intercambio di informacion Sr. Oduber a comparti e noticia cu Conseho di Minister ta cla pa crea incentivo fiscal pa esnan interesa den restaura un monumento. Esaki ta encera un areglo di "belasting aftrekbaar" y/of exhoneracion di "overdracht belasting" den caso di un monumento. E incentivonan fiscal aki lo mester bay den combinacion cu un standarisacion pa lo cual ta trata e proceso di restauracion di un monumento. Intencion ta pa motiva mas inversion den nos monumentonan. Pero pa salvaguardia, mantene y renoba un edificio cu ta wordo considera monumento semper a mustra di ta un proceso complica y sin un liña di maneho fiho. A yega te na e punto cu hasta mundo di construccion mes su deseo pa traha riba e tipo di edificionan aki a baha considerablemente, hopi biaha debi na e falta di transparencia cu ta necesario pa renobacion y mantencion di monumentonan. Minister Oduber a indica na e ekipo di Monumenten Bureau cu el a ricibi varios comentario cu e departamento a bira corto di asistencia y te cu un pasado recien nan tin e fama di un departamento critico y exigente. Pero e ta sigur cu despues di e encuentro aki por traha riba un miho relacion. Esaki ta motibo directo cu a acerca un compania di Corsou, Newton Heritage Consulting atraves di Oficina di Monumento pa traha cu nos instancianan local riba un manual pa maneho di monumentonan pa yega na un solucion pa e situacion aki y asina crea tambe liñanan di maneho. E mandatario a comparti tambe e plan pa bin cu metodonan internacional cu por reduci e gasto di renobacion, mantencion y/of restauracion di monumentonan reduciendo e gastonan cu aproximadamente 20%. Esaki ta motibo tambe cu Gobierno a dicidi di añadi 36 edificio na e lista di monumentonan.

E empleadonan di Monumenten Bureau a keda hopi satisfecho cu tur e informacionnan ricibi y e oportunidad pa haci nan preguntanan na e mandatario cual e la tuma su tempo pa contesta cada un di nan. Por conclui cu despues di e encuentro aki a establece un relacion di trabou mas estrecho y conhuntamente lo sigui promove un parti importante di cultura di Aruba.

Expresionnan haci den e articulo aki no necesariamente ta refleha opinion di ArenaPoliti.co