DEN HAAG/ORANJESTAD- Prome Minister Mike Eman ta na Europa actualmente unda atendiendo COP21 na Paris. Siendo na Europa Prome Minister a combina su bishita cu un presentacion den e Internationaal Perscentrum Nieuwpoort. Riba invitacion di Genootschap Nederland Aruba el a papia diahuebs 3 di December riba e ‘Reto y Ambicionnan’ di Aruba. E sala tabata yen di hende cu a bin pa scuch’e. Den su discurso Prome Minister Eman a ilustra e desaroyo di e relacionnan den Reino y su vision riba futuro di Aruba dentro di Reino y region Caribense. Tambe el a papia riba Status Aparte , su di 30 aniversario, su reto y exitonan, tanto pa Aruba como Hulanda. Un punto cu a resalta den su discurso ta e ‘desigualdad’ cu tin den Reino pa loke ta Aruba. Presidente di e Genootschap Nico van Grieken a bisa cu e variacion di e cantidad di hende den e sala ta ilustracion di e aprecio cu tin pa Prome Minister Eman. “Sr. Eman, mi conoce bo desde añanan 90 y pesey mes mi kier bisa algo aki. Bo inspiracion, bo dedicacion, conocimento, sabiduria y pasion pa loke ta e vision di Aruba, tin su efecto. Amigo y enemigo, partidista y contrapartidista mester admiti esaki.” Van Grieken tabatin solamenente palabranan di admiracion pa Eman y su forma con como un di e poco politiconan kier fortifica y stimula na manera efectivo e relacionnan cu Reino. Presidente di e Genootschap siguientemente a cita Jacques Delors, president di e comision Europeo den e siglo pasa. “Competencia ta stimula, cooperacion ta fortifica y solidaridad ta unifica.” Van Grieken a bisa di a usa e quote aki pasobra e ta pas 100% pa Prome Minister Eman. Despues di a papia un rato riba e retonan cu Aruba ta confrontando na 2016, van Grieken a duna Prome Minister palabra.

Prome Minister Eman a gradici van Grieken pa su bunita palabranan y tabatin tambe palabranan di elogio pa e ‘Genootschap di Hulanda y Aruba’, un institucion  importante cu ta yuda ora mester. Eman a bisa cu para dilanti e di 30 aniversario di Status Aparte, ta un bon momento pa para keto na e historia su tras. Kico tabata e retonan e tempo ey, e retonan cu Aruba tin awe y e ambicionnan pa mayan. “E caracteristicanan di e Arubiano ta core manera un liña cora den henter e historia di e isla y su lucha pa su Status Aparte. Miho mi bisa manera un liña berde den historia.”, Eman den forma humoristico a bisa. Den corto el a conta di e ciere di refineria Lago net na  momento cu Aruba tabata hayando su tan anhela Status Aparte. E tempo ey Lago tabata representa 50% di entrada di e isla. Di biaha Aruba a hay’e confronta cu un desempleo di 35%. GDP a bay bek cu 30 pa 40%. Lago a anuncia su ciere 2 aña prome cu Status Aparte y e pregunta grandi tabata si Status Aparte por sigui, pasobra hasta cu un economia prospero hopi tabata pensa cu Aruba no por a maneha e status nobo, corda den un situacion di crisis. Eman: “E pueblo di Aruba a lucha añanan largo pa e Status Aparte. E no tabata djis un coincidencia. Ta algo cu Aruba a scohe p’e. Mi welo, tata y hopi otro lidernan tabata para na cuna di e lucha aki. Riba 18 di maart 1948 na Conferencia di Mesa Rondo  un abogado hoben di apensas 25 aña, a entrega un mocion pa Aruba haya su Status Aparte. E abogado ey tabata mi tata y te dia di awe 18 di maart ta nos Dia Nacional. Den e mocion ey tabatin poni e deseo di Aruba pa bira un Status Aparte. E mocion a wordo accepta. Despues a bin un temporada largo unda tabatin otro formanan di structura estatal cu a wordo entrega. Pero profin dia 1 di januari 1986 Aruba a celebra su Status Aparte. Apesar di e crisis di ciere di Lago Aruba a scohe pa sigui cu su Statsu Aparte. Mi kier enfatisa aki cu esaki a sosode riba propio forsa.”


“Apesar di e problemanan financiero cu Aruba tabata confrontando, ningun hende tabata para cu un saco di placa pa yuda nos.”, Eman a bisa cu hopi firmesa. Aruba a haya hopi conseho si di expertonan di Hulanda. E consehonan aki ta documenta como prueba. “Nan a bin bisa nos cu Hulanda tin algun boto bieu ainda y cu Aruba por haya nan pa hendenan bay pisca. Tambe cu e Arubianonan mester biba mas ‘zuinig’ door di p.e. baña cu cuatro hende hunto. Nan a ofrece pa Arubianonan imigra bay biba na Hulanda, loke hopi a haci tambe  e tempo ey. Pero, e lidernan politico di Aruba, entre nan  e Prome Minister na 1986, di kende mi ta masha orguyoso, mi ruman Henny Eman y hendenan di comercio a bin hunto y a dicidi otro. Nan a mira e potencial di e Arubiano y di e isla.” Prome Minister Mike Eman a splica su audiencia con a bay traha tur cu tin riba turismo. A pensa duro kico e futuro di Aruba ta bay bira. Awe Aruba ta un isla unda tin mas di 1,7 miyon turista ta bin di bishita . Aruba ta florece danki na e desaroyonan economico cu e industria aki ta trece cu ne. Mayoria hende na Aruba ta gana nan pan den turismo cu ta sigui crece tur aña.” Eman a toca varios tema durante e anochi aki na Den Haag. E asunto di desigualdad den Reino ta uno cu a hala hopi atencion. Den un otro articulo lo amplia riba e asunto aki.

Expresionnan haci den e articulo aki no necesariamente ta refleha opinion di ArenaPoliti.co