Durante e encuentro cu Parlamento tabata tin cu Minister De Meza y e ehecutivonan di WEB y Elmar nos a puntra e mandatario kiko tin di berdad cu lo tin un compania priva den WEB cu ta produci awa y ta bende WEB e awa aki. Minister De Meza den su contesta a confirma cu den WEB tin un compania priva cu ta traha awa pa bende cu WEB.

Estudio enves di inverti 100 miyon florin
Segun Minister De Meza den WEB e compania General Electric tin un planta mobil cu ta produciendo awa na un manera mas barata cu locual WEB ta produciendo awor cu e inversionnan den motornan recipe y e technologia di reverse osmose. E mandatario a indica cu WEB ta haciendo un estudio cu e planta mobil aki y pesey a huur in e mobil aki for di e compania priva General Electric na balor di 11 miyon florin. E planta mobil ta wordo opera pa General Electric mes y e awa produci ta wordo bendi na WEB. E minister no a indica si e gasto di e compra di awa ta inclui den e 11 miyon florin. Minister De Meza a djies indica cu WEB a haci e estudio aki pa evita di mester inverti 100 miyon florin.

Pisca morto y azeta den kanaal patras di WEB
Durante e encuentro nos a hala e mandatario su atencion riba e hecho cu nos a compronde cu ta e mesun planta aki na februari 2015 a haye cu problema cu bacteria den awa y cu lo a laba e tanki cu quimico pa despues benta esaki den e kanaal patras di WEB. Esaki tabata tin como consecuencia cu un cantidad grandi di pisca a muri y a bin na supervicie. Prensa a indica e tempo ey cu test di awa y autopsia lo mester revela kiko a pasa cu a pone e piscanan muri. Pero remarcabel ta cu tur hende na WEB y den prensa a keda keto riba esaki, siendo cu ta algo cu concerni salubridad di e Pueblo aki. Banda di esaki e mesun temporada tabata tin e derame di azeta tambe den e kanaal patras di WEB cu a afecta e rifnan grandemente. Esaki ta pone hende pensa si acaso no ta e mesun planta mobil aki ta locual a derama e azeta aki. Remarcabel ta cu Minister De Meza a keda keto y no a duna ningun comentario alrespecto.

Investigacion mester trece claridad
Ya cu Minister De Meza y e ehecutivonan di WEB mes no ta duna mucho informacion pa trece claridad den kiko ta pasando na WEB, ta na su lugar pa bin un investigacion pa Pueblo por haya sa ta dicon nos mester di un otro planta den WEB pa traha awa pa WEB. Y mas cu claro Pueblo mester por haya sa si ta pa descuido di e planta aki e bida maritimo y nos rifnan a keda afecta.


8 december 2015

Expresionnan haci den e articulo aki no necesariamente ta refleha opinion di ArenaPoliti.co