Pinturanan riba Baranca di nos isla, di suma importancia pa keda documenta 

Recientemente Minister Otmar Oduber a reuni cu arkeologonan di nos Museo Arkeologo conhuntamente cu Dr. A. Versteeg. E reunion tabata specificamente riba documentacion di dibuhonan riba baranca.
Pa algun aña caba tin un interes grandi pa e pinturanan riba baranca na diferente sitio arkeologico riba nos isla. Dr. A.Versteeg for di 1996 a inicia cu un estudio specifico riba nan pero debi na otro circunstancianan mester a pone un pausa na esaki. Na 2008 a reanuda cu e trabounan riba e pinturanan riba baranca. Pa e ultimo añanan conhuntamente cu arkeologo local Harold Kelly, Dr. Versteeg ta enfoca riba cataloga tur e pinturanan riba baranca cu tin riba nos isla. Desde 1827 ya caba diferente dibuho riba baranca a keda documenta y den siglo 20 tambe, y te hasta algun aña atras ainda a descubri mas.  Nunca antes tur a keda documenta hunto. E ta bay ta un proyecto cu lo tin un base cu un inventario completo di tur e pinturanan pero tambe un forma pa reconoce cierto sitionan arkeologico como monumento of pa nan bay riba e World Heritage List di UNESCO.
Segun Arkeologico Raymundo Dijkhoff e ta un proyecto hopi importante pa Aruba: "E ta importante pa nos identidad y nos cultura. Minister Oduber a compronde esaki. E ta un trabou interdepartamental entre otro cu Universidad di Leiden, Museo Arkeologico di Aruba y Ministerio di Cultura cu ta traha hunto den e proyecto aki."
E documentacion lo keda publica den un buki di mas di 400 pagina cu lo tin mas di 950 potret di entre otro 25 pa 30 sitio arkeologico. Segun e Arkeologo na Aruba tin mas di 200 sitio di diferente epoca periodonan pre-ceram y ceram cu ta 3500 pa 4000 aña di prehistoria, despues tin tambe e periodo despues di e añanan di  e  Europeonan tambe tin e sitionan historico. Pero pa locual ta e pinturanan riba baranca ta un categoria diferente y enfocando riba esaki ta entre 25 pa 30 sitio specifico. Pa acumula tur e material y pone den un formato di publicacion lo tin un duracion di un aña. Raymundo Dijkhoff ta elabora: "E ta bay tuma su tempo pero importante ta cu na final ora presenta e proyecto aki e lansamento lo ta man den man cu un celebracion grandi cual ta  e di 35 aniversario di Museo Arkeologico."   
Aruba ta rico den historia y den hopi aspecto unico tambe. Indra Zandaam consehero di Minister di Cultura ta comenta cu den e proyecto di e dibuhonan riba barcanan a constata aspectonan cu na Aruba so por a nota esaki. "Aruba ta profila su mes como unico den nos region. Por ehempel nos pinturanan riba e barancanan ta conecta cu otro, algo sumamente special." Sra. Zandaam ta sigui comenta cu pa banda di ministerio e tipo di informacionnan aki ta di suma importancia pa por comparti cu comunidad, pa mas y mas nos realisa e importancia di e aspecto  aki den nos herencia cultural. Minister Otmar Oduber lo sigui sostene e proyecto aki y alabes crea conscientisacion entre diferente stakeoldersnan pa brinda e espacio pa haci e tipo di estudionan aki. Por resulta cu e sitionan arkeologico ta riba tereno priva. Zandaam ta splica cu e rol di ministerio den un caso asina lo ta pa intermedia den e sector priva y Museo Arkeologico pa percura cu tur sosten  y tur clase di cooperacion keda brinda pa un estudio asina importante pa nos isla.

Expresionnan haci den e articulo aki no necesariamente ta refleha opinion di ArenaPoliti.co