PRESUPUESTO SUPLETORIO APROBA, CU CONSEHO NEGATIVO DI CFT Y RAAD VAN ADVIES. KIKO HULANDA TA BAI HASI AWOR? 
Siman pasa e fraccion di AVP Parlamento a aproba e presupuesto supletorio pa 2015 debi na e hecho cu nan a gasta 60 miyon dimas. El’a gasta dimas na biahamento, fiestamento, huurmento di edificio, gasto di abogado, y coordinador y ministernan. Pa tapa e buraco aki a bin cu varios alternativa sumamente iresponsabel. Entre otro ta bende edificio di gobierno, a saca extra dividend di companianan estatal, y ta pidi SVB pa dispensa un debe di gobierno di 60- miyon florin. Tur ta decisionnan descabeya y CONTRA tur conseho di CFT y Raad van Advies. Locual ta remarcabel ta cu ta AVP ta e autor y creador di CFT. Nan a defende e CFT cu tur forsa, y no a importa nada pa yega na e punto ey. Hasta a manda maton den parlamento pa intimida oposicion, y tira riba manifestantenan pafo di Parlamento.
Y awor cu nan mester cumpli cu CFT su conseho, nan ta mustra cu nan no ta cumpli cun’e. A pone e advies di CFT un banda y hasta a chercha di CAFT, bisando cu CFT no sa di kiko e ta papia, cu CFT tin cifras equiboca, cu CFT ta ganja! AVP y Mike Eman a demostra un biaha mas di ta farsante. E gran pregunta ta awor: kiko Hulanda ta bai hasi? Nan ta bai tene Mike Eman na su compromisonan hasi cu Hulanda den e ley di CFT? Of nan ta bai sigi duna oxigeno politico na e gobierno di Mike Eman cu ya politicamente ta muribundo, y ta wordo teni na bida cu oxigeno di Den Haag.

AVP DEN PASADO A HIPOTECA SANTANA Y AWOR TA BENDE PROPIEDAD DI PUEBLO 
Partido AVP ta conosi como traidor di patria, pa e entrega di nos autonomia den anjanan 40 cu e 12-8 y awor atrobe na anja 2015. Pero no solamente traidor di patria, nan ta conosi tambe como bendedor di patria. Den gobierno di Henny Eman, pa haya mas placa hasta kier a hipoteca Santana y Misa. Mike Eman ta bai mas leew, e no ta hipoteca so, pero e ta bende tambe: ministerio public, warda di polis, hulpbestuurskantoor, douane, domeinbeheer, pa despues e bai huur di amigonan y sponsor di campanja. Y kiko ta bin despues? E ta bai bende tambe Santana cu Misa? Of scol? E gobierno iresponsabel aki a gasta tur placa y awor hasta kier bende patrimonio di pueblo.

UTILITIES TA REGALA GOBIERNO 6 MIYON EXTRA, DICON NO A BAHA PRIJS DI AWA Y CORIENTE PA PUEBLO?
Dia 1 di oktober 2014 WEB y ELMAR a hisa tarifa di coriente pasobra e compania tabata bai malo. Pueblo a manifesta dia 1 di oktober 2014, y Mike Eman manera un gran cobarde a manda RIOTT COMMANDO bati hende muher y muchanan manifestando. Awe ta resulta cu WEB no tabata nada di den problema, pasobra atraves di Utilities a regala Mike Eman 6 miyon florin pa e por paga su gastonan di biahe y fiestamento. En bes di duna Mike Eman e placa ey, dicon WEB no por a baha su tarifanan?

MIKE EMAN TA PIDI SVB UN REGALO DI 60.5 MIYON FLORIN
Desde cu Mike Eman a bin na mando, el’a tuma un gran cantidad di medida contra nos fondonan di pensioen. Supuestamente tabata pa hasi e fondonan mas fuerte, pero awor ta resulta cu no ta asina. Ta resulta cu Mike Eman a ganja atrobe! Mike Eman a corta den pensioen, ela hisa edad di pensioen, ela hisa e prima di pensioen. Medidanan cruel contra e clase trahador y contra nos pensionadonan. Y awor cu e fondo ta fuerte, e tin e curashi di bai bati na porta di SVB y mendiga pa un regalo di 60.5 miyon florin! El’a ranca miyones di pueblo pa hinca den e fondo, pa awor pidi di SVB un donacion di 60.5 miyon florin pa e por sigi biaha y fiesta. Acaso ta esaki gremionan a bai di acuerdo cun’e den Dialogo Social? Pa suta pueblo di un banda y despues usa e mesun placa ey pa duna Mike Eman un regalo di 60.5 miyon florin? Mike Eman no kier a contesta e pregunta aki den Parlamento.

OTMAR ODUBER TA BAHA SUBSIDIO DI ARUBUS PASOBRA ARUBUS NO MESTER MAS PLACA
Un parti tristo pero alabes hilarico den e presupuesto ta cu Otmar Oduber ta baha e subsidio di Arubus mas ainda, pasobra Arubus ta gana hopi placa cu propaganda riba e tram nan. Un proyecto di tram absurdo cu a costa nos pais 25 miyon florin! 25 miyon florin cu por a wordo hinca den e scol nobo na Noord. Pero locual ta causa dolor ta cu Otmar Oduber abin cu e medida di ARUPARKING pa pueblo paga pa parker, pa Arubus haya poco placa mas. Awor ta bin bisa cu Arubus no mester mas placa pasobra e tin hopi caba. Bon, kiko e ta awor? Arubus mester di placa? Of Arubus no mester di placa? Pasobra si Arubus no mester di e placa, por elimina Aruparking anto!

VIA PORTA DI CUSHINA SCHWENGLE TA BIN BUSCA PLACA PA SALA DI OPERACION Y TA BURLA DI BABA HERDE Y AVP
Cu e proyecto di Hospital ta un proyecto corupto, tur hende sa. Pero cu den e afan di tanto corupcion awor minister Schwengle ta burla di su propio fraccion di AVP ta algo interesante. E proyecto di Hospital ta costando pueblo miyones extra pasobra nan a scohe e proyecto di un amigo. Pa colmo a “lubida” e salanan di operacion. Dos biaha minister Schwengle a bin parlamento pa pidi placa pa e salanan di operacion, pero Baba Herde a mande bek bai hasi su huiswerk miho. E mester a bin bek caba cu un “feitenonderzoek”, pero awor minister Schwengle ta drenta parlamento pa porta di cushina, y hinca e salanan di operacion den presupuesto. Asina ela burla di Baha Herde y su fraccion berde, y pa colmo de los colmos, Baba Herde y fraccion di AVP a bai di acuerdo tambe!

COBRANSA DI BELASTING Y STUDIE LENING CU A CADUCA
Gobierno di Mike Eman ta persisti den su afan pa castiga e pueblo y den esey hasta ta viola ley. Ley ta stipula cu si un debe caduca, bo no por cobre mas. Pero e gobierno aki ta cobrando miyones di debe di belasting y di studielening cu a caduca dia biew. Y den parlamento a confirma cu lo sigi cu e maneho cruel aki. Mientras nan amigonan tur por gosa di e deal di belasting di Mike de Mesa, cu a haya exoneracion di miles y miles di florin, e homber chikito ta esun cu mester paga belasting cu a caduca caba. Pesey pueblo, OJO! Si 5 anja a pasa caba, informa bo mes pa bo no paga cos cu bo no debe mas!

NOS A BISA CU CFT LO NO YUDA, TA E PEN MESTER KITA DI EMAN
Hopi hende, despues di lesa tur esaki lo puntra su mes, dicon CFT ni Hulanda ta yuda nos? Desde cu nos a trata e ley di CFT, nos a bisa bon cla cu CFT no tey pa yuda nos. CFT a bin pa duna Mike Eman un salbabida. Ta solamente e pueblo por salba e pueblo. Ta solamente si kita e pen di Mike Eman, e ora por bin salbacion pa nos pueblo. Mientras tanto ta importante pa tur hende sa kiko realmente ta pasando cu finansas di nos pais pa asina pueblo realisa cuanto danjo Mike Eman a, y ta sigi hasi na nos pais.

Expresionnan haci den e articulo aki no necesariamente ta refleha opinion di ArenaPoliti.co