In Memoriam mi amigo Piet Pronk 

‘Hombo mano’, un frase cu bo tabata uza hopi biaha pa dia. Mi lo sinti falta di e tende esaki, pero di mucho mas cu esey. Mi lo sinti falta di e amistad profundo cu nos tabatin, di bo sentido di compromiso, bo sabiduria, bo lealtad y integridad sin condicion. Bo tabata para banda di mi den tur decision facil y dificil cu mi tabata tuma. Semper cu conseho pa drecha, mehora y na final cla pa yuda ehecuta y defende cu alma y cuerpo. Como mi consehero principal mi por a confia bo cu tur documento y si mi mira cu bo a acorda nan, mi tabata sigur cu nan ta oke, pasobra bo a pasa riba cada letter, cada coma y punt den e documento.

Bo tabata un anker den olanan bruto pa mi, mi coleganan y tur cu a bati na bo porta cu nan problema. Bo a nace na Hulanda, pero bo stimacion pa Aruba tabata manera cu ta Bo Pais natal. Un amor sin limite pa e Pueblo y e Pais. Te na ultimo ainda bo tabata traha. For di bo cas bo tabata lesa documento y duna conseho riba temanan di importancia pa pais Aruba. Bo aporte na mi, pero tambe Aruba henter ta di un magnitud grandi.

Prome cu Piet a bira mi consehero legal, el a duna mi les na Colegio Arubano, unda e tabata conrector banda di su amigo fiel Dolf Hoevertsz. Mi no tabata mucho amigo di scol y manera un tata Piet a duna mi e guia cu mi tabatin mester. Piet tabata consehero di mi ruman Henny durante su gobernacionnan, di Mito Croes, Watty Vos y di su amigo di tur tempo Eddy Croes. Piet a fungi durante e ultimo seis añanan aki como mi consehero principal, pero tabata tambe e consehero di casi tur cu tabata traha cu mi, tambe riba tereno priva. Su porta semper tabata habri pa tur cu a bin cerca dje cu nan keho, nan problema y nan inkietud. Nan tabata sigur cu si nan a cont'e algo den privacidad cu Piet nunca lo kibra e confiansa cu nan a pone den dje.

“Bo tabata un homber recto, severo, husto cu respet pa tur hende. Nunca bo a haci distincion ora bo mester a para pa ‘bo’ hendenan y pa bo principionan. Un amigo fiel. Un bon casa pa Tiny, un bon tata pa su yiunan Kitty, Annemarie y Yolanda y bon opa pa su nietonan. Bon pa e pueblo di Aruba y algo cu mi a admira, un persona cu a compronde y brasa mi maneho social y atencion pa esnan mas vulnerabel y esnan cu ta representa gruponan cu mester proteccion den nos comunidad, manera nos empleadonan, nos muchanan y nos hendenan grandi. Cu Piet mi por a sinta oranan largo hunto cu gremionan, sindicatonan y OPA pa logra cosnan importante pa e empleado y e pensionado den Dialogo Social. Aunke un sindicalista di curason, Piet su amor tabata grandi pa e gremionan comercial tambe.   

“A haci nos dolor ora nos cu tabata na hospital den bo ultimo momentonan pa mira con e homber fuerte y luchado, tabata bringa cu tur ardor pa keda aki. Bo tabata  kier a bin bek Bestuurskantoor  pa sigui traha, esey tabata bo ultimo deseo. Bo tabata cansa, pero asina mes luchando te bo ultimo rosea. E lucha tabata uno desigual. Morto a yega demasiado tempran y a hiba bo pa semper for di nos. Mi tabata para eynan sin por a haci nada. Mi a sinti un pena grandi pasobra mi lo kier a cana e ultimo caminda hunto cu bo, ilumina esaki pa bo, tene bo man, pero e ta un caminda cu bo so mester a cana. Mi ta spera cu e caminda aunke solitario, tabata facil y cu bo a yega bo destino, trankil, sin ningun preocupacion. Un dia nos tur tin cu cana e caminda ey. E caminda cu ta ilustra final di bida na mundo. Cu nos bon Creador tuma Piet den su Reino. Cu e sosega na paz y cu luz eterno lusa p’e.  

Mike y Doina Eman

Expresionnan haci den e articulo aki no necesariamente ta refleha opinion di ArenaPoliti.co