Durante tratamento di Presupuesto di Pais Aruba pa aña 2016, nos a mira un Minister President papiando pa oranan largo di sostenibilidad, sin duna e concepto aki ningun tipo di contenido.
Loke si por a sinti ora cu a scucha sr. Eman su discurso di sostenibilidad, ta cu Gobierno aparentemente ta contra Serlimar sin hasi mucho pa proteha nos medio ambiente.

Siman pasa, un biaha mas, dump na Parkietenbos tabata na candela, poniendo Aruba den lus negativo mundialmente pa cu maneho ecologico. Turistanan cu ta bin bishita nos isla bou di e promesa di conoce e “Aruba Paradise” tabata testigo di e sufrimento constante di nos ecologia, ora cu nan por a mira cu nan mesun wowo e candela na dump.
Un candela cu por a wordo preveni si e proyecto di “Waste to Waste System” no a wordo boycotia pa Mike Eman su Gobierno.
Gabinete Mike Eman 1 & 2 a boycotia proyectonan esencial pa e maneho ambiental di nos pais simplemente pasobra ta proyectonan di Gobierno di MEP. Un actitud cu aparte di ta uno infantil y hipocrita ta demostra di ta contra e desaroyo di e pueblo Arubano.

Pa 6 aña largo AVP su Gobierno no tabatin un maneho ecologico efectivo pa nos isla.
Nos ta mira un cantidad grandi di dump ilegal rond di nos isla, cu cada dia ta birando mas hopi. Y ta parse cu e Gobierno aki ta apoya e iniciativa robes di dump ilegal, pasobra nan no ta incentivando nos pueblo pa ta mas consciente den e maneho di sushi.


Definitivamente ora cu nos papia di un Gobierno hipocrita y infantil, nos tin cu papia di Gabinetenan Mike Eman 1 y 2.
2 siman pasa, durante tratamento di Presupuesto 2016, Partido MEP a entrega un mocion caminda ta urgi Gobierno pa baha e suma cu ta cobrando pa recohe sushi, di 35 florin pa 10 florin. Lastimamente e Parlamentarionan di AVP a vota contra e mocion aki sin por a duna argumentonan valido.
Ironicamente tempo ex Minister Booshi Wever a propone pa cobra 10 florin mensualmente pa recohe sushi, Partido AVP den oposicion a demonisa e proposicion aki argumentando cu e tabata un medida abusivo contra pueblo di Aruba. Pero awor cu nan ta den Gobierno, cobra 35 florin mensualmente no ta un abuso contra pueblo. Hipocresia na gran escala mi ta yama esaki!

Ora cu nos mira cu e maneho ecologico di nos pais ta den man di 2 Minister, esta Benny Sevinger y Mike de Meza, y nos por comproba cu no tin maneho efectivo y responsabel pa cu esaki, nos ta realisa cu e Gobierno aki no sa mes kiko nan ta hasiendo. Un politica di papia bunita pero sin duna peso y contenido na loke nan ta papia, esey ta e politica di Partido AVP.
Nos ta corda ainda con Gobierno, Minister Sevinger pa ta mas exacto, a bin keha na Parlamento bisando cu supuestamente nos di Partido MEP no ta apoyando Serlimar.
Pero ora cu nos bay wak den Presupuesto 2016 pa Pais Aruba, ta poni atrobe cu Serlimar lo haya menos placa y cu ta na aña 2016 Gobierno lo bay wak si nan por bira 100% cliente di Serlimar. Otro hipocresia mas di Partido AVP! Pasobra si bo tin bo mes un compania estatal cu ta haci e trabou nan aki, pakiko bo ta prefera duna otro companianan e trabou na lugar di duna esun di bo mes?

Awor Mike Eman & Co. kier culpa pueblo di Aruba pa e situacion precario di Serlimar, argumentando cu como cu pueblo no kier paga e suma barbaro di 35 florin pa luna, Serlimar ta den cora. Pero loke cu nan no kier bisa ta cu Serlimar ta den cora danki na nan mesun mal maneho como Gobierno, pasobra nan mes no ta kere den e compania, y nan mes no kier hasi uzo di su servicionan.
Pakiko boycotia Serlimar deliberadamente como Gobierno, sabiendo cu e ta un compania cu ta pertence na pueblo di Aruba?
Gobierno su postura pa cu Serlimar ta duna nos e imprecion cu nan kier mata Serlimar financieramente.

Bou maneho di MEP nos lo percura pa uni bek e maneho di medio ambiente bou di un Ministerio, cu e vision pa hasi Serlimar rendabel y auto suficiente pa e compania por keda den funcion. Mester percura pa pais Aruba bira e cliente principal di Serlimar.
Nos lo pone e bureau di City Inspector den mesun maneho cu Serlimar, y nos lo duna nan e respaldo hudicial necesario pa nan por tin e autoridad suficiente pa duna process verbaal na esnan cu ta susha nos isla.
Esaki lo inclui un division riba lama pa zorg cu oil spill lo ta algo di pasado, si e pasa mes lo tin consecuencia financiero pa esnan responsabel.
Di e manera aki nos lo sigura cu Serlimar lo mantene su mes riba pia, garantisando trabou na tur e trahadornan.
Nos lo crea campañanan educativo pa asina hasi un sistema di reciclahe hopi mas efectivo y responsabel pa nos isla.

Den un mundo moderno y un maneho sostenibel di berdad, no tin lugar pa un dump manera esun na Parkientenbos, ni ningun tipo di dump ilegal.

Expresionnan haci den e articulo aki no necesariamente ta refleha opinion di ArenaPoliti.co