Minister Bermudez: "Un paso grandi a wordo tuma riba e ruta pa yega na presupuestonan balansa"
ORANJESTAD - Recientemente Minister di finanzas, Angel Bermudez a informa Staten y entrega un rapport riba ehecucion di e presupuesto di pais Aruba durante ultimo kwartaal di 2015.
E reportahe ta mustra cu durante e ultimo kwartaal di 2015 un tremendo trabao a wordo desplega pa e departamentonan concerni y cu esaki a resulta den cifranan preliminar cu ta indica cu e deficit pa henter aña 2015 a keda dentro di e norma di e ley LAft.
"Pa 2015 esaki ta 3.7% , pero tur indicador ta mustra cu e deficit a sali algo riba 2% di nos GDP", asina Minister Bermudez a informa. Segun e mandatario, e resultado aki principalmente ta pa motibo cu e entrada total di 1.252 miyon a keda realisa manera a presupuesta.
Di otro banda, e gastonan di Gobierno tambe a keda 30 miyon florin abou di loke a wordo aproba y esaki ta suma na 1.350 miyon. E mandatario a splica cu den e lunanan venidero e cifranan lo wordo concretisa definitivamente den e cuenta anual pa Staten, sin embargo e mandatario ta convenci cu e deficit definitivo lo keda abou di e norma stipula pa ley.
Minister Bermudez ta hopi satisfecho cu e resultado pa 2015 y ta sigur cu si sigui den e mesun ritmo, lo por logra e normanan pa 2016 y 2017 tambe!
Finalmente e mandatario ta gradici tur esunnan cu ta contribui grandemente na e hazaña aki, muy en particular Departamento di Impuesto, cu a cana e miya extra pa logra realisa e entradanan presupuesta.
Expresionnan haci den e articulo aki no necesariamente ta refleha opinion di ArenaPoliti.co