Desde 1 di December 2014 BBO ta subi bay 2,5% y esaki hunto cu e otro medidanan di Gabinete Eman lo pone cu Pueblo lo keda severamente afecta pa inflacion. Awor Pueblo lamentablemente mester paga e prijs pa e mal gobernacion di Gabinete Eman.

E ta conoci cu partido AVP a gana eleccion na 2009 cu e promesa di elemina BBO. Asina cu Gabinete Eman a yega na mando nan a corta BBO den dos ya cu nan no por a laga gobierno sin entrada. Na 2010 caba IMF a adverti Gabinete Eman cu si e no kier BBO pa e busca un belasting alternativo y tuma dos aña pa hinke den otro. Pero como cu 2013 tabata aña di eleccion Gabinete Eman no a haci nada. Na 2013 atrobe IMF a adverti Gabinete Eman y ata awor despues di tanto cu a papia di elemina BBO, awe e mesun Minister Eman ta firma pa hisa BBO na 2,5%. Y ainda falta, ya cu den e rapport di CFT tin poni cu gobierno mester hisa BBO na por lo menos 4,5% pa asina por recupera e danio haci door di Gabinete Eman na nos finanzas publico.

E subimento di BBO aki, manera ta e caso ora di introduci cualkier belasting, lo tin un efecto inflatorio cune. Tur cos lo subi di prijs y Pueblo lo sinti esaki hasta den e productonan basico manera pan, lechi, gas, gasoline etc. Tur e productonan aki lo subi di prijs y lo haci cu e poder di compra di e Pueblo lo bay atras. Banda di esaki e medida di e subida di prijs di coriente cu 15% tambe lo causa cu prijsnan lo subi, principalmente ora di bay supermarket Pueblo lo sinti con su placa no lo yega ya cu tur producto ta subi di prijs. Pa no papia mes di e 26,50 florin cu Pueblo mester bay paga pa Serlimar recohe sushi. Sin lubida, poco dia atras Gabinete Eman a kita e alivio cu e Pueblo pagador di loonbelasting of inkomstenbelasting tabata haya ora cu tin inflacion, pa nan paga menos belasting. Ni riba e alivio aki di corehi belasting na inflacion Pueblo por conta mas ya cu Gabinete Eman no tin placa y den e situacion ey Minister di Finanzas no lo baha belasting conforme e inflacion.

Tur e medidanan aki di Gabinete Eman lo crea un inflacion grandi y lo afecta e cartera di Pueblo severamente. Anto e medida mes cu Gabinete Eman mester a tuma di baha di 9 pa 7 minister pa spaar placa di Pueblo, no ta wordo tuma.


1 december 2014

Expresionnan haci den e articulo aki no necesariamente ta refleha opinion di ArenaPoliti.co