DEN HAAG -- Lider di MEP Evelyn Wever-Croes ta actualmente na Hulanda pa hiba reunionnan cu varios parlamentario Hulandes. Ela reuni tambe cu secretario general encarga cu asuntonan di Reino sr Richard van Zwol.  "Ta importante pa tene e linea di cominicacion habri entre nos y Hulanda pa nos wordo informa di e pasonan cu Hulanda tin pensa di tuma y pa nos informa gobierno Hulandes mas tanto posibel di e desaroyonan na Aruba. 

Un tema cu nos a toca den e reunion cu sr van Zwol ta e tema financiero di Aruba, especialmente en bista di e publicacionnan di Banco Central. E aspecto hopi preocupante den esaki ta cu Banco Central a publica un deficit real mucho mas halto cu locual gobierno a registra na 2015 tresiendo asina duda den e cifranan di gobierno. Pero locual ta mas alarmante ta e hecho cu pa 2016 e proyeccion di cresemento economico ta hopi mas abou cu gobierno tabata tin registra den e presupuesto 2016. 

Un otro tema di e reunion tabata e tema di "rechtshandhaving", e necesidad cu nos tin na Aruba pa nombra un Procurador General pronto y fortifica Ministerio Publico cu hende y material pa por ehecuta investigacionnan grandi. Pasobra e problema aki mester wordo soluciona cu urgencia. Nos tin hopi trabou pa hasi na cas pa pone cosnan na orden. Pa pone orden den finansas publico y pa stop di manipula cu cifras. Y sin lubida, nos tin hopi trabou pa hasi pa trese integridad bek den gobernacion y un Ministerio Publico cu ta funciona optimal ta hopi necesario. 

Tin mas tema cu nos a trata durante e reunion cu sr van Zwol cu tabata tambe un bon reunion.

Expresionnan haci den e articulo aki no necesariamente ta refleha opinion di ArenaPoliti.co