Parlamentario mr. Xiomara Maduro (MEP): Banco Central ainda no tin un splicacion pa e diferencia grandi den cifra di deficit pa 2015
Diahuebs merdia e Comicion Financiero di Parlamento a reuni cu Banco Central pa haya un bista riba e cifranan di Pais Aruba (outlook) pa 2016, e deficit di Pais Aruba pa 2015 y haya splicacion riba e retonan cu e banconan local ta enfrenta pa locual ta e reglanan di FATF. Durante e reunion e Presidente di Banco Central a hiba palabra y tres ehecutivo a duna un presentacion sigi despues pa pregunta di e Parlamentarionan. Remarcabel ta cu Banco Central te ainda no tin un splicacion pa e diferencia grandi den cifra di deficit pa 2015.
Mester sinta ainda cu Departamento di Finanzas
Un informacion cu hopi ta pendiente di dje ta e splicacion di Banco Central riba e cifra di deficit pa 2015 cu ta dobbel mas hopi cu esun publica pa Gobierno y usa den e rapport di CFT riba e cifranan di e ultimo kwartaal di 2015. Lamentablemente Banco Central a bin reuni cu Parlamento sin e informacion aki. Segun e Presidente di Banco Central a splica, ta diabierna 7 april 2016 numa Banco Central lo reuni cu Departamento di Finanzas pa asina hunto pasa den e cifranan pa saca afor dicon Banco Central ta yega na un deficit cu ta dobbel mas grandi.
Dificultad pa haya informacion
Mester remarca cu e informacion brinda pa Banco Central ta contene cifranan te cu 1 di December 2015 ya cu te ainda Banco Central no ta dispone di e cifranan di comienso di 2016. Esey ta un di e problemanan cu nos ta observa, cu instancianan no ta haya cifra y informacion di Gobierno na tempo y esey ta trece cune cu ta bin un retraso grandi den analysis y pronostico necesario pa nos Pais. Den nos opinion e problema aki mester wordo resolvi mas pronto cu ta posibel. Sigur awor cu nos Pais ta bou di supervicion financiero di CFT.
Espacio pa Gabinete Eman manipula
E situacion na unda cu tin tanto tardansa pa haya cifra y informacion ‘up-to-date’ di Gobierno, ta ideal pa asina Gabinete Eman haya espacio pa manipula cu cifra. Pasobra si nos tuma por ehempel e supervicion di CFT, nan a basa nan opinion riba cifranan di 2015 cu un deficit di 98 miyon siendo cu Banco Central un par di dia despues ta publica e mesun cifranan di 2015, pero cu un deficit di 201,6 miyon. Kizas si Banco Central lo tabata tin tur informacion mas promer, nan lo por a publica nan cifranan mas adelanta y no mester tabata existi un diferencia asina grandi den deficit.
Banco lo revisa su cifranan
Dependiendo di e informacion cu Banco Central ricibi, nan lo revisa e cifranan di 2015 y nan pronostico pa 2016. Nos lo keda pendiente pa haya e informacion di Banco Central pa asina por brinda Pueblo un splicacion pakiko tin un diferencia asina grandi den e deficit di 2015 publica pa Banco Central y esun presenta pa Gabinete Eman.
7 april 2016
Expresionnan haci den e articulo aki no necesariamente ta refleha opinion di ArenaPoliti.co