ORANJESTAD – 'Green Corridor' ta un proyecto cu ta bay tin un rol importante riba trafico na Aruba. E 'vierbaansweg' of caminda di 4 via, ta bay haci e fluho di trafico entre pabou y pariba di brug uno mas lihe, sigur y eficiente. Ora cu e proyecto keda finalisa, e lo bay alivia hopi di e dolor di cabes cu automobilistanan ta pasa aden tur dia na e momentonan aki.

Dialuna mainta tempran ora cu Prome Minister Mike Eman a tene su conferencia di prensa na e sitio unda cu e caretera di 4 via ta cuminsa banda di aeropuerto, por a mira cu propio wowo e fila largo di auto cu tabata bayendo, principalmente direccion di Playa den oranan di mainta. Den esaki ta bini un cambio sigur pa augustus 2017 ora cu henter e proyecto di Green Corridor ta cla.

Cuminsamento di e siman aki a pone e prome pida capa di asfalt di e proyecto y tur dia lo bay ta bashando 500 meter di asfalt pa finalisa e caretera nobo, te cu Pos Chiquito na luna di mei awor. Na momento cu esaki ta cla, ta cuminsa inmediatamente drecha e caminda bieu (panort di caminda) y pone den optima condicion.

Den e siguiente fase di e proyecto ta sigui cu e caretera di Pos Chiquito bayendo direccion di San Nicolas, cu ta inclui tur zijwegen, incluyendo e aspecto di embeyecemento di e areanan na banda y construccion di parke y veldnan deportivo.

Pa e mandatario e alegria den e proyecto aki ta e mehoracion di calidad di bida den e espacionan cu lo keda entre e caminda y e casnan. “For di Pos Chiquito te San Nicolas lo no tin solamente un caretera di 5 strea, pero camindanan na banda ta miho coordina, cu menos stof pa e bisiña y “ta haci cu e proyecto aki ta uno sumamente exitoso pa e pueblo,”Eman a bisa.

“E proyecto aki ta parti di un vision mas grandi cu nos a bini cune na 2009 pa eleva e infrastructura y calidad di bida di nos hendenan,” e mandatario a menciona den su conferencia di prensa dialuna mainta riba e ruta di proyecto Green Corridor. El a agrega cu ta pesey a saca tur e proyectonan cu tabatin 30 pa 40 aña drumi den lachi, y a cuminsa haci tur e tramitenan pa nan wordo realisa. Asina a realisa e mudamento di waf di carga, e vierbaansweg, ta bay cuminsa cu ringweg 3 (Watty Vos Blvd) y ta construyendo na hospital un compleho medico nobo.

Watty Vos Bloulevard ta un otro proyecto cu ta wordo ehecuta denter di poco y e trafico cu ta baha for di esun di Green Corridor ta drenta e Boulevard aki, unda ta separa e trafico cu ta bay direccion Playa for di esun cu ta bay pa e area di Hotelnan y Noord. E diseñonan ta cla y ta trahando awor riba e parti di financiamento di e proyecto y ta algo cu Gabinete Mike Eman II ta spera cu por keda concretisa dentro di poco.

Expresionnan haci den e articulo aki no necesariamente ta refleha opinion di ArenaPoliti.co