MEP: contra, contra, contra!!! 

Siman pasa a haci reforma di algun ley di seguro social cu ta cay bou di SvB. E cambionan tur ta na beneficio di trahadornan. Ta solamente e fraccion di AVP a vota pa e cambionan aki. Partido PDR no a bin traha e dia ey. Partido MEP a haci wega irresponsabel djis pa purba gana simpatia di trahadornan. Anto na fin MEP a vota CONTRA. Loke e ley di reforma di SVB cu a wordo aproba  ta nifica, ta esaki: 

FONDO DI SEGURO DI MALESA Y ACCIDENTE 
Awor e fondo di seguro pa cubri entrada di trahadornan ora nan bira malo ta sano atrobe y por sigura e trahadornan nan salario pa hopi aña mas. MEP A VOTA CONTRA! 
Awor e fondo di seguro pa cubri entrada di trahadornan ora nan haya accidente a keda sanea. E fondo por sigui sigura e trahadornan pa hopi aña mas. MEP A VOTA CONTRA! 

E leynan ta sigura cu tur trahador mester wordo inscribi na SvB ora nan cuminsa traha. E doño di trabou mester paga e primanan pa cada trahado. Si e doño di trabou no haci esaki e trahado ta core e riesgo di keda sin entrada si e bira malo of haya accidente. Door di e cambio di e ley, di awor en adelante e dunado di trabou lo haya un multa pisa si e no inscribi e trahado y paga su prima. Pasobra pa AVP no ta acceptabel cu un trahado ta duna di su parti, pero ora e bira malo of haya accidente ta bin haya sa cu e no ta cubri, pasobra e no ta inscribi of no a paga prima pe. Esey a caba awor. MEP A VOTA CONTRA!
Cu e reforma aki mas trahado te cu un salario te 70 mil pa aña tambe ta cay bou di e seguro di cubri entrada ora di enfermedad of accidente. Te awor nan no tabata tin niun seguro. MEP A VOTA CONTRA.
E cambio di ley cu AVP a presenta ta haci cu awor ora un trahado perde su trabou pa motibo cu su compania a bay bancarota, e ta haya dos biaha mas placa cu antes.

Asina e reformanan di e fondo di SvB cu ta parti di e reformanan cu ya a salba e Fondo di Pensioen di Behez y e fondo di pensioen di APFA a finalisa. E fondonan cu tabata core peliger di bay bancarota na 2009 bou di gobierno di MEP, of cu lo mester a corta den beneficio pa e trahadornan, awor ta sano atrobe! E fondonan aki ta sigura entrada di mas cu 20 mil pensionado na Aruba! Anto MEP a vota CONTRA!

Expresionnan haci den e articulo aki no necesariamente ta refleha opinion di ArenaPoliti.co