Partido Democracia Real, a tene su rueda semanal di prensa diamars. Andin Bikker a baha pisa riba  e ola di criminalidad cu ta sutando e Isla aki. El a bisa cu nos comunidad ta cansa, fada y harta di e situacion aki y gobierno mester saca su conclusion. 

PDR a tuma nota cu den fin di siman tabata tin por lo menos cuater atraco y hasta den un caso e atracadornan a bisti uniform di polis, pa comete nan fechoria. E minister di husticia te ainda no tin un plan y cada bez ta cana rond ta busca excuse. Pesey varios mocion di desconfianza e minister a haya den parlamento caba. Tempo di eleccion e prome minister a cana rond ta priminti cu e ta bay soluciona e problema di criminalidad cu e tempo ey e tabata considere hopi serio, pero awor aki e situacion a bay for di man. 

E parlamentario a bolbe trece dilanti cu hasta minister Otmar Oduber a manda un voto di desconfianza pe precisamente door di criminalidad, y a menciona esaki como un di y nuebe puntonan cu el a pone riba un carta pa Gobernador, dia 6 di Januari cu si no ta haya solucion dia 1 di Maart e ta pidi su retiro y pesey e ta pidi e minister pa invita resto di gabinete Eman 2 bay cune pasobra esaki no ta tolerable mas. 

Andin Bikker no ta compronde pakico minister di husticia of inhusticia no a saca su conclusion pasobra un persona no por ta un pais ni un pais no ta un persona. El a bisa bek cu pa motibo cu nos tin un gabinete cu ta keda sostene e minister aki, nos pueblo tin cu keda sufri pa via di esaki. E ta cuestiona cu pa colmo prome minister Eman ta spaar fly miles, pasobra atrobe e tin tres siman for di Aruba y e ta puntra di unda ta sali cu desde cu el a drenta gobernacion biaha e ta biaha, y awor pa tres siman si no ta mas. Si no ta biaha y saca potret tur caminda, ora e ta na Aruba ta chapi den cura cana rond, haci tur cos menos bin Bestuurskantoor y den Parlamento practicamente e no ta bin.

Den salubridad nos ta gastando hopi placa, pero hopi hende ta bay afo busca su salud pasobra nos salud publico no ta hayando atencion y e no ta caminda mester ta.

Asina ta riba otro sectornan tambe, y esaki ta algo hopi hopi serio, segun Bikker, y el a ripiti den nomber di  nos pueblo cu nos comunidad ta harta di tanto criminalidad cu ta sutando nos pais y esaki no por sigui asina mas.

PRD ta para pa loke e ta bisa y si tin mas mocion di desconfianza contra e minister di Husticia nan ta para su tras, pasobra no por sigui acepta loke ta pasando awor akinan.

Expresionnan haci den e articulo aki no necesariamente ta refleha opinion di ArenaPoliti.co