"Awor aki matrimonio na Aruba ta un laso legal, emocional y pa algun un laso religioso. Pero semper entre un homber y un muhe. Esaki no ta bay cambia!" Asina Rene Herde, lider di e fraccion di AVP a bisa den reuda di prensa di e fraccion di AVP. Rene Herde a splica cu for di combersacionnan personal cu e tabata tin den ultimo simannan cu lidernan religioso di diferente denominacion na Aruba, ela compronde cu e temor mas grandi cu nan tin, ta cu den ley lo cambia e definicion di un matrimonio. Rene Herde' a sigura nan cu esaki no ta bay sosode. Ela hasta palabra cu lidernan religioso, cu nan lo haya e texto final di e amienda cu su colega Desiree Croes kier entrega, prome cu e reunion. Cu esaki e lider di e fraccion di AVP ta kita e duda cu e discucion riba e tema a crea. Den su palabranan: "E matrimonio ta keda un lazo entre un homber y un muhe".

UNION CIVIL
Loke e amienda pa un "union civil" ta haci, ta crea un instrumento legal pa sigura igualdad pa tur hende cu ta scohe pa no casa of pa compaña un hende. E lo duna nan e derecho di herencia, di haya e pensioen di e persona cu e ta compaña y e autoridad legal pa actua den su nomber mescos cu tur otro hende. Pesey no tin motibo pa nenga cualkier grupo di hende den nos comunidad. For di e combersacionnan cu Rene Herde' a tene cu lidernan religioso, ela compronde cu nan no ta contra di esey tampoco. Nan preocupacion ta pa e instituto di matrimonio keda uno entre un homber y un muhe. Rene Herde': "E amienda cu lo wordo trata, lo sigura cu esey ta keda asina."

COMPAÑA
Rene Herde a conta cu ela lanta ta conoce famianan cu tabata famianan mescos cu tur otro, cu un mama, un tata y jiunan. Pero despues ela descubri cu e majornan nunca a casa. Nan tabata compaña otro. Ta te ora a yega na asuntonan di pensioen di e partner of asuntonan di herencia, cu a bin discubri cu nan no tabata tin nada regla den ley y no tabata tin e derecho cu famianan si tabata tin. E necesidad pa crea un forma pa sigura e derecho legal pa hendenan cu scohe pa no casa of cu scohe pa compaña e persona cu e stima, tabata existi hopi tempo caba. E union civil ta pa sigura nan e derechonan legal cu otronan tin caba.

Expresionnan haci den e articulo aki no necesariamente ta refleha opinion di ArenaPoliti.co